पुणे : दिल्लीतील जंतर-मंतरवर आंदोलन करून चर्चेत आलेल्या कॉकरोच जनता पार्टीचे संस्थापक अभिजीत दीपके आता पुन्हा एकदा महाराष्ट्रातील प्रश्नांवर सक्रिय होण्याच्या तयारीत आहेत. यासाठी पुढील आठवड्यात पुण्यात पक्षाच्या प्रमुख कार्यकर्त्यांची, आंदोलनातील संयोजकांची आणि सहकाऱ्यांची महत्त्वाची बैठक आयोजित करण्यात येणार आहे. या बैठकीत आगामी आंदोलनाची दिशा, नियोजन आणि पुढील रणनीती निश्चित केली जाणार असल्याची माहिती समोर आली आहे.
काही दिवसांपूर्वी छत्रपती संभाजीनगर येथे पुण्यातील कॉकरोच जनता पार्टीच्या एका प्रमुख कार्यकर्त्याने अभिजीत दीपके यांची भेट घेतली. या भेटीत पुणे दौरा, राज्यातील विविध प्रश्न आणि पुढील आंदोलनाची रूपरेषा यावर सविस्तर चर्चा करण्यात आली. आंदोलनाच्या सुरुवातीपासून मदत करणारे कार्यकर्ते, समर्थक आणि विविध स्तरावरील सहकाऱ्यांचा सहभाग या विशेष बैठकीत असणार असल्याचे सांगितले जात आहे.
दिल्लीतील आंदोलनानंतर आता पक्षाचे लक्ष महाराष्ट्रातील विविध प्रलंबित प्रश्नांकडे वळले आहे. ड्रग्ज इन्स्पेक्टर भरती, टीईटी पेपरफुटी तसेच विविध भरती प्रक्रियेशी संबंधित वादग्रस्त प्रकरणांवर राज्यभर आंदोलन उभारण्याची तयारी सुरू असल्याची चर्चा आहे. या विषयांवर प्राथमिक स्तरावर चर्चा झाली असून अंतिम निर्णय पुण्यातील बैठकीत घेतला जाण्याची शक्यता आहे.
यापूर्वी अभिजीत दीपके यांच्या नेतृत्वाखाली पुण्यात झालेले आंदोलन मोठ्या प्रमाणावर चर्चेत आले होते. त्यानंतर दिल्लीच्या जंतर-मंतरवरील आंदोलनामुळेही त्यांना देशभरात ओळख मिळाली. या घटनांनंतर त्यांच्या राजकीय आणि सामाजिक उपस्थितीची चर्चा वाढली असून, महाराष्ट्रातही त्यांच्या पुढील भूमिकेकडे अनेकांचे लक्ष लागले आहे. दरम्यान, आता राज्यातील स्थानिक प्रश्नांवर कॉकरोच जनता पार्टी कोणती भूमिका घेणार आणि आगामी आंदोलनाला किती प्रतिसाद मिळणार, याकडे राजकीय वर्तुळासह तरुणांचेही लक्ष लागले आहे.
