लोणी काळभोर, (पुणे) : थेऊर – लोणीकंद मार्गावर भरधाव वेगाने आलेल्या स्कॉर्पिओने समोरून येणाऱ्या कारला जोरदार धडक दिली. या अपघातात कारमधील महिलेचा जागीच मृत्यू झाला आहे. तर त्यांची 18 वर्षीय मुलगी गंभीर जखमी झाल्याची घटना शुक्रवारी (ता. 04) सकाळी आठ वाजण्याच्या सुमारास थेऊर येथील स्मशानभूमी परिसरात घडली.
सिमरोट नाईक (वय 44, रा. 811, तळोजा एमआयडीसी रोड, लोधा क्राऊन प्रोजेक्ट डोंबीवली पुर्व कल्याण ठाणे) असे जागीच मृत्यू झालेल्या महिलेचे नाव आहे. तर पल्लवी नायक व असे जखमी झालेल्या मुलीचे नाव आहे. याबाबत नितीन साईनाथ गांगुर्डे (वय -34, रा. रोहाऊस नंबर 19, आवसर रोहाऊस, कोनार्क नगर, आडगाव शिवार, नाशिक शहर) यांनी लोणी काळभोर पोलीस ठाण्यात फिर्याद दिली. त्यानुसार अज्ञात चालकावर लोणी काळभोर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, नितीन साईनाथ गांगुर्डे व सिमरोट नाईक हे मित्र मैत्रीण आहेत. शुक्रवारी नितीन गांगुर्डे हे त्यांच्या कारमधून मैत्रीण सिमरोट नाईक व तिची मुलगी पल्लवी यांना घेऊन कल्याणहून बंगळुरूकडे निघाले होते. वाटेत थेऊर येथील गणपतीचे दर्शन घेण्याचे नियोजन असल्याने ते वाघोलीमार्गे थेऊरकडे येत होते. शुक्रवारी सकाळी सुमारे पाऊणे आठ वाजण्याच्या सुमारास कोलवडी-थेऊर रोडवर, थेऊर स्मशानभूमीजवळ समोरून एक पांढऱ्या रंगाची स्कॉर्पिओ भरधाव वेगाने आली.
स्कॉर्पिओ अचानक आपल्या दिशेने आल्याचे पाहून गांगुर्डे यांनी कार उजव्या बाजूला घेण्याचा प्रयत्न केला. मात्र, स्कॉर्पिओने त्यांच्या कारला डाव्या बाजूने जोरदार धडक दिली.धडकेनंतर गांगुर्डे यांची कार रस्त्याच्या कडेला असलेल्या नदीलगतच्या लोखंडी संरक्षण कठड्यावर जाऊन आदळली. या अपघातात कारच्या डाव्या बाजूला बसलेल्या सिमरोट नाईक तसेच मागील सीटवर असलेल्या पल्लवी नाईक यांना गंभीर दुखापत झाली. गांगुर्डे यांच्या डोक्यालाही मार लागला.
अपघातानंतर घटनास्थळी नागरिकांची गर्दी झाली. त्यावेळी धडक देणाऱ्या स्कॉर्पिओचा चालक वाहन घटनास्थळीच सोडून कोणतीही मदत न करता पसार झाल्याचे फिर्यादीत नमूद करण्यात आले आहे. नागरिकांनी जखमींना खासगी वाहनातून वाघोली येथील आयएमएचएस मल्टीस्पेशालिटी हॉस्पिटलमध्ये दाखल केले. उपचार सुरू करण्यापूर्वीच डॉक्टरांनी सिमरोट नाईक यांना सकाळी साडेआठ वाजता मृत घोषित केले. त्यांची मुलगी पल्लवी हिला गंभीर अवस्थेत आयसीयूमध्ये दाखल करण्यात आले असून ती बेशुद्ध असल्याचे फिर्यादीत नमूद आहे.
दरम्यान, हॉस्पिटल प्रशासनाने लोणी काळभोर पोलिसांना एमएलसीची माहिती दिल्यानंतर पोलिसांनी रुग्णालयात जाऊन गांगुर्डे यांचा जबाब नोंदविला. त्यांच्या तक्रारीनुसार, स्कॉर्पिओ क्रमांक एमएच 45 सीक्यू 0228 वरील अज्ञात चालकाविरोधात भरधाव व निष्काळजीपणे वाहन चालवून अपघात घडवून आणल्याचा, तसेच अपघातानंतर जखमींना मदत न करता घटनास्थळावरून पसार झाल्याचा आरोप करण्यात आला आहे.अपघातानंतर पसार झालेल्या स्कॉर्पिओ चालकाचा पोलिसांकडून शोध सुरू आहे.
