पुणे, ता. १४ : महाराष्ट्र पोलीस दलातील दीर्घकालीन आणि निष्कलंक सेवेसाठी पोलीस उपनिरीक्षक विद्याधर ज्ञानदेव निचित यांना यंदाचे ‘अति-उत्कृष्ट सेवा पदक’ जाहीर करण्यात आले आहे. स्वातंत्र्यदिनाच्या पूर्वसंध्येला पोलीस महासंचालक सदानंद दाते यांनी जाहीर केलेल्या पदकांमध्ये निचित यांच्या नावाचा समावेश आहे.
पोलीस उपनिरीक्षक विद्याधर निचित यांनी पुणे ग्रामीण पोलीस दलात तब्बल ३५ वर्षे सहा महिने सेवा बजावली आहे. त्यांच्या प्रदीर्घ सेवाकाळात उल्लेखनीय कामगिरीबद्दल त्यांना आतापर्यंत ३४७ बक्षिसे मिळाली असून, त्यांच्या सेवेत एकही शिक्षा नसल्याचे सांगण्यात आले आहे. त्यांच्या उत्कृष्ट सेवेची दखल घेत १ मे २०१७ रोजी पोलीस महासंचालक सन्मानचिन्ह पदकाने त्यांना गौरविण्यात आले होते. त्यानंतर आता त्यांच्या दीर्घकालीन आणि निष्कलंक सेवेचा आणखी एक मोठा सन्मान झाला आहे.
न्यायालयीन कामकाजातही उल्लेखनीय योगदान
सध्या निचित हे शिवाजीनगर न्यायालयात कोर्ट पैरवी अधिकारी म्हणून कार्यरत आहेत. न्यायालयीन कामकाजात सरकारी वकिलांशी सातत्याने समन्वय साधून संबंधित गुन्ह्यांच्या सुनावणीसाठी आवश्यक माहिती व कागदपत्रे उपलब्ध करून देत ते प्रभावीपणे मदत करतात.
विद्याधर निचित यांच्या कार्यकाळात यवत पोलीस ठाण्यातील मोक्का प्रकरण तसेच दौंड पोलीस ठाण्यातील विविध गंभीर गुन्ह्यांमध्ये आरोपींना जन्मठेपेची शिक्षा झाली आहे. तसेच वेल्हा, कामशेत आणि दौंड पोलीस ठाण्यांतील इतर गंभीर गुन्ह्यांमध्येही आरोपींना शिक्षा होण्यासाठी त्यांनी केलेल्या न्यायालयीन कामगिरीचा महत्त्वपूर्ण वाटा असल्याचे सांगण्यात आले.
स्वातंत्र्यदिनाच्या पार्श्वभूमीवर सन्मान
भारत सरकारच्या गृह मंत्रालयाच्या अधिसूचनेनुसार पोलीस दलातील अधिकारी व अंमलदारांच्या दीर्घकालीन आणि निष्कलंक सेवेची दखल घेण्यासाठी ‘उत्कृष्ट सेवा पदक’ आणि ‘अति-उत्कृष्ट सेवा पदक’ प्रदान केले जाते. महाराष्ट्र पोलीस दलातील उल्लेखनीय व गुणवत्तापूर्ण सेवेची दखल घेत १५ ऑगस्ट २०२६ रोजीच्या स्वातंत्र्यदिनाच्या पार्श्वभूमीवर हे पदक जाहीर करण्यात आले आहे.
पोलीस महासंचालक सदानंद दाते यांनी पदक प्राप्त अधिकारी व अंमलदारांचे अभिनंदन करून त्यांच्या भावी सेवेस शुभेच्छा दिल्या आहेत. दरम्यान ३५ वर्षांहून अधिक काळाची निष्कलंक सेवा, ३४७ बक्षिसे आणि एकही शिक्षा नसलेली कारकीर्द यामुळे पोलीस उपनिरीक्षक विद्याधर निचित यांचा ‘अति-उत्कृष्ट सेवा पदका’ने झालेला गौरव पुणे पोलीस दलासाठी अभिमानाचा क्षण ठरला आहे.
