आंबेगाव : शेतातील विहिरीवरील मोटार सुरू करण्यासाठी गेलेल्या 50 वर्षीय महिलेचा विजेचा धक्का लागून मृत्यू झाल्याची दुर्दैवी घटना आंबेगाव तालुक्यातील कळंब येथे घडली. या घटनेमुळे भालेराव कुटुंबावर दुःखाचा डोंगर कोसळला असून गावातही हळहळ व्यक्त होत आहे. निर्मला जालिंदर भालेराव असे मृत महिलेचे नाव आहे.
मिळालेल्या माहितीनुसार, निर्मला भालेराव सकाळच्या सुमारास नेहमीप्रमाणे शेतातील विहिरीजवळ कृषी पंप सुरू करण्यासाठी गेल्या होत्या. मात्र, बराच वेळ झाला तरी त्या घरी परतल्या नाहीत. त्यामुळे कुटुंबीयांना चिंता वाटू लागली. त्यांचा मुलगा आईचा शोध घेत विहिरीजवळ पोहोचला. त्यावेळी निर्मला या विद्युत पेटीजवळ बेशुद्ध अवस्थेत पडलेल्या दिसल्या.
कुटुंबीयांनी तातडीने त्यांना मंचर उपजिल्हा रुग्णालयात नेले. मात्र, डॉक्टरांनी तपासणी केल्यानंतर त्यांना मृत घोषित केले. त्यांच्या पश्चात दोन मुले आणि एक मुलगी असा परिवार आहे.
दरम्यान, घटनेची माहिती मिळाल्यानंतर महावितरणचे सहाय्यक अभियंता निखिल तिवारी यांनी कर्मचाऱ्यांसह घटनास्थळी पाहणी केली. प्राथमिक तपासात मोटारीच्या स्टार्टर बॉक्समध्ये उंदीर शिरल्याचे आढळून आले. या उंदराने बॉक्समधील विद्युत तारा कुरतडल्याने विद्युत प्रवाह लोखंडी पेटीत उतरल्याचा अंदाज व्यक्त करण्यात आला. या घटनेत उंदराचाही मृत्यू झाला होता.
निर्मला भालेराव यांनी पेटीला हात लावताच त्यांना जोरदार विजेचा धक्का बसला आणि त्यांचा मृत्यू झाला, अशी प्राथमिक माहिती समोर आली आहे.
भालेराव कुटुंबाची आर्थिक परिस्थिती बेताची असल्याने महावितरणने कुटुंबाला तातडीने आर्थिक मदत द्यावी, अशी मागणी ग्रामस्थ आणि कुटुंबीयांनी केली आहे. दरम्यान, शेतकऱ्यांनी कृषी पंप आणि विद्युत पेटीजवळ योग्य अर्थिंग करून घ्यावे. तसेच विजेच्या गळतीपासून संरक्षणासाठी ELCB बसवावे, असे आवाहन महावितरणकडून करण्यात आले आहे.
