लोणी काळभोर, ता. ११ : कदमवाकवस्ती (ता. हवेली) परिसरातील दुकानदारांनी परराज्यातील कामगारांची पोलिस पडताळणी करणे बंधनकारक असतानाही त्याची पूर्तता न केल्याचा प्रकार पोलिसांच्या तपासणीत सोमवारी (ता. १० ऑगस्ट) दुपारी दीड सुमारास समोर आला आहे. लोणी स्टेशन परिसरातील ‘श्री राधे व्हरायटी’ आणि ‘आदित्य कलेक्शन’ या दोन दुकानांच्या मालकांनी कामगारांची पोलिस व्हेरिफिकेशन न करता त्यांना कामावर ठेवल्याचे आढळून आल्याने लोणी काळभोर पोलिसांनी दोघांविरुद्ध भारतीय न्याय संहिता कलम २२३ अंतर्गत कायदेशीर कारवाई सुरू केली आहे.
श्रवण पटेल व हडमत सिंह अशी गुन्हा दाखल करण्यात आलेल्या दुकानदारांची नावे आहेत. याप्रकरणी सहाय्यक फौजदार भारती होले यांनी सरकारतर्फे लोणी काळभोर पोलीस ठाण्यात फिर्याद दिली आहे. दरम्यान, पुणे शहर पोलिस आयुक्तांनी ४ जुलै ते १ सप्टेंबर २०२६ या कालावधीसाठी भारतीय नागरिक सुरक्षा संहिता २०२३ मधील कलम १६३(३) अन्वये विविध आदेश जारी केले आहेत. या आदेशानुसार परराज्यातील कामगारांची आवश्यक माहिती पोलिसांना देणे आणि त्यांची पडताळणी करून घेणे अपेक्षित आहे.
पोलिसांनी दिलेल्या माहितीनुसार, विशेष शाखेच्या महिला सहायक पोलिस फौजदार भारती होले तसेच लोणी काळभोर पोलिस ठाण्याचे कर्मचारी परिसरात आदेशाची अंमलबजावणी करण्यासाठी गस्त घालत होते. त्यावेळी लोणी स्टेशन, कदमवाकवस्ती येथील श्री राधे व्हरायटीची तपासणी करण्यात आली.दुकानमालक श्रवण पटेल यांच्याकडे काम करणारा हर्षण देवासी (वय २०, मूळ राजस्थान) याची पोलिस पडताळणी झालेली नसल्याचे तपासणीत समोर आले. तसेच त्याबाबतची माहिती पोलिस ठाण्यात दिली नसल्याचेही मालकाने सांगितल्याचे पोलिसांनी नमूद केले आहे.
दरम्यान, दुपारी साडेतीनच्या सुमारास पोलिस पथकाने आदित्य कलेक्शनची तपासणी केली. दुकानमालक हडमत सिंह यांच्याकडे काम करणारा कुलदीप सिंह (वय २१, मूळ राजस्थान) याचीही पोलिस पडताळणी करण्यात आली नसल्याचे आढळले. कामगाराबाबतची आवश्यक माहिती लोणी काळभोर पोलिस ठाण्यात देण्यात आली नसल्याचेही पोलिसांच्या निदर्शनास आले.
आदेश असूनही नियमांकडे दुर्लक्ष?
पुणे शहर पोलिस आयुक्तालयाने सुरक्षेच्या दृष्टीने परराज्यातून येणाऱ्या कामगारांची माहिती व पोलिस पडताळणी करण्याचे आदेश दिलेले असतानाही त्याकडे दुर्लक्ष होत असल्याचे या कारवाईतून समोर आले आहे. त्यामुळे ‘कामगारांची पोलिस व्हेरिफिकेशन करणे एवढेही कठीण आहे का?’ असा सवाल उपस्थित होत असून, अशा प्रकारे नियमांचे उल्लंघन करणाऱ्या अन्य आस्थापनांवरही पोलिसांनी कारवाई करावी, अशी मागणी नागरिकांकडून होत आहे.
दरम्यान, या दोन्ही प्रकरणांमध्ये आदेशाची जाणीवपूर्वक अवज्ञा केल्याचा ठपका ठेवत संबंधित दुकानमालकांविरुद्ध भारतीय न्याय संहिता कलम २२३ अन्वये कायदेशीर कारवाई करण्यात आली आहे.
