इंदापूर, (पुणे) : निमगाव केतकी (ता. इंदापूर) येथील पतसंस्थेत ड्रायव्हर म्हणून काम करणाऱ्या कर्मचार्‍याला आत्महत्येस प्रवृत्त केल्याप्रकरणी सरपंचासह चार जणांवर इंदापूर पोलीस ठाण्यात गुन्हा दाखल करण्यात आला. सागर अंकुश वडापुरे (वय ३३) असे आत्महत्या केलेल्या तरुणाचे नाव आहे. तर निमगाव केतकीचे विद्यमान सरपंच प्रविण डोंगरे, सुनंदा डोंगरे, मंगेश कुदळे आणि सुनिता भोंग अशी गुन्हा दाखल करण्यात आलेल्या चौघांची नावे आहेत. याबाबत सोमनाथ वडापुरे यांनी इंदापूर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आत्महत्याग्रस्त सागर वडापुरे हा गेल्या दोन वर्षापासून निमगाव केतकी येथील सुवर्णयुग पतसंस्थेत कामाला होता. त्याला ड्रायव्हिंगचे काम येत असल्याने तो चारचाकी गाडीवर ड्रायव्हर म्हणुनही काम करत होता. आरोपी यांनी आत्महत्याग्रस्त सागर वडापुरे याच्यावर मुलीच्या गळ्यातील सोन्याची साखळी चोरीचा आरोप करून त्याला कामावरून काढले होते. त्याला फोन करून तसेच गावात बदनामी करुन वेळोवेळी मानसिक त्रास दिला जात होता.
व्याजाच्या पैशासाठीही त्याच्याकडे तगादा लावला जात असल्याने सतत होणाऱ्या बदनामीला कंटाळून सागर वडापुरे याने शनिवारी (ता. 02) शेतातील लिंबाच्या झाडाला दोरीच्या साह्याने गळफास घेत आत्महत्या केली. याबाबतची फिर्याद मयत सागर वडापुरे याचा भाऊ सोमनाथ वडापुरे यांनी इंदापूर पोलीस स्टेशन येथे दिली.
या तक्रारीनुसार या सर्व आरोपींवर आत्महत्येस प्रवृत्त केल्याप्रकरणी गुन्हा दाखल करण्यात आला आहे. दरम्यान, या प्रकरणी अद्याप कोणालाही अटक झाली नसून पुढील तपास इंदापूर पोलीस ठाण्याचे सहाय्यक पोलीस निरीक्षक राजकुमार डुणगे हे करत आहेत.
