भोर: पुण्यातील भोर तालुक्यातील नसरापूर परिसरात घडलेल्या अमानुष घटनेने आता न्यायालयात महत्त्वाचे वळण घेतले आहे. 1 मे रोजी घडलेल्या या दुर्दैवी घटनेत केवळ 3.5 वर्षांच्या चिमुरडीवर झालेला अत्याचार आणि तिची निर्घृण हत्या यामुळे संपूर्ण परिसर हादरला होता. सुनावणी दरम्यान न्यायालयासमोर सीसीटीव्ही चित्रीकरण आणि पीडितेचे फोटो सादर करण्यात आले, तेव्हा कोर्टातील वातावरण अत्यंत गंभीर झाले. आता या प्रकरणाची जलदगती सुनावणी पुण्याच्या विशेष न्यायालयात सुरू असून, न्यायालयात मांडलेले पुरावे पाहून उपस्थितांचे मन हेलावले आहे.
विशेष न्यायालयाने या प्रकरणाची दररोज सुनावणी घेऊन लवकरात लवकर निकाल देण्याचे आदेश दिले आहेत, जेणेकरून पीडितेच्या कुटुंबाला न्याय मिळेल.
विशेष न्यायाधीश एस. आर. साळुंखे यांच्या समोर हे प्रकरण सुरू आहे. शुक्रवारी सरकारी वकील अजय मिसर यांनी पहिल्या 6 साक्षीदारांची साक्ष नोंदवून घेतली. यात पीडितेचे आई-वडील आणि घटनेच्या वेळी आरोपीला मुलीसोबत पाहणाऱ्या प्रत्यक्षदर्शी ग्रामस्थांचा समावेश होता.
आरोपीने मुलीला पळवून नेल्याचे प्रत्यक्षदर्शींनी सांगितल्यानंतर आणि पुराव्यांवरील क्रूरता पाहून खुद्द साक्षीदारही रडू लागले. बचाव पक्षाच्या वकिलांनी काही प्रश्न उपस्थित केले असले तरी, सरकारी पक्षाने जन्मदाखला आणि मृत्यूचा पंचनामा सारखे भक्कम पुरावे सादर केले.
पुणे ग्रामीण पोलिसांनी या प्रकरणात 1100 पानांचे आरोपपत्र दाखल केले आहे. यात 125 साक्षीदार असून, 82 मुख्य जणांची साक्ष नोंदवण्यात येणार आहे. आरोपीवर भारतीय न्याय संहितेच्या कलम 238 अंतर्गत वाढीव कारवाईसाठी युक्तिवाद सुरू आहेत. दरम्यान, आरोपीला कठोर शिक्षा व्यावी यासाठी प्रयत्न सुरु आहेत.
