पुणे : विमानतळ परिसरात (Pune Crime) घडलेल्या एका (Pune News) गंभीर घटनेत, फटाके आणण्यासाठी आलेल्या 9 वर्षांच्या अल्पवयीन मुलीशी अनुचित वर्तन केल्याच्या आरोपावरून 63 वर्षांच्या व्यक्तीला विमानतळ पोलिसांनी अटक केली आहे. अटक करण्यात आलेल्या व्यक्तीचे नाव अस्लम महंमद हुसेन शेख (वय 63, रा. विकासनगर, कालवड वस्ती, लोहगाव) असे आहे. हा प्रकार 16 ऑक्टोबर रोजी सायंकाळी सव्वासहा वाजण्याच्या सुमारास घडला.
पोलिसांनी दिलेल्या माहितीनुसार, आरोपी अस्लम शेख हा हातगाडीवर फटाके विक्री करत होता. त्याच्याकडे फटाके खरेदीसाठी ही 9 वर्षांची मुलगी आली होती. ती एकटी असल्याचे पाहून त्याने तिला घरी नेले आणि तिचा विनयभंग करत तिची पप्पी घेतली. आरोपीने तिच्याशी अयोग्य वर्तन केले. या प्रकरणाची माहिती समजताच मुलीच्या पालकांनी तात्काळ विमानतळ पोलीस ठाण्यात धाव घेत तक्रार दाखल केली.
तक्रारीनंतर पोलिसांनी त्वरीत कारवाई करत आरोपीला अटक केली असून त्याच्याविरुद्ध बालकांवरील लैंगिक अत्याचार प्रतिबंधक कायदा (POCSO) आणि भारतीय दंड संहितेतील संबंधित कलमांनुसार गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक गुंड करत आहेत.
या घटनेमुळे परिसरात चिंतेचे वातावरण निर्माण झाले असून पोलिसांनी नागरिकांना आपल्या मुलांवर लक्ष ठेवण्याचे आणि अपरिचित व्यक्तींशी संपर्कात येताना खबरदारी घेण्याचे आवाहन केले आहे.
