पुणे : शहरात पुन्हा कोयता गॅंगने डोके वर काढल्याचे दिसून येत आहे. सिंहगड रस्त्यावरील माणिकबाग परिसरात मध्यरात्री हत्यार धारी टोळक्याने तुफान राडा घालत वाहनांची तोडफोड केली. पार्क केलेल्या पाच कार आणि दुचाकींची तोडफोडकरून दहशत माजवली. मध्यरात्री झालेल्या याप्रकारानंतर परिसरात भितीचे वातावरण पसरले होते. शनिवारी मध्यरात्री ही घटना घडली आहे.
याप्रकरणी सिंहगड रोड पोलीस ठाण्यात सचिन डाके (वय ३१, रा. रामनगर) यांनी तक्रार दिली आहे. त्यावरून अनोळखी व्यक्तींवर गुन्हा नोंद करण्यात आला आहे. दमऱ्यान, याप्रकरणात अद्याप कोणाला पकडण्यात आलेले नाही.
मिळालेल्या माहितीनुसार, तक्रारदार रामनगर येथे राहण्यास आहेत. जैन मंदिरासमोरच्या परिसरातील रस्त्यांवर रहिवाशी वाहने पार्क करतात.
दरम्यान, तक्रारदारांनी नेहमीप्रमाणे त्यांची कार पार्क केलेली होती. मात्र मध्यरात्री दुचाकीवर आलेल्या हत्यारधारी टोळक्याने या वाहनांची तोडफोड केली. वाहनांच्या काचा फोडून तसेच हत्याराने मारून नुकसान केले. तर, दुचाकींवर देखील मारहाणकरून तोडफोड केली. त्यानंतर हे टोळके पसार झाले. नेमकी हा प्रकार का घडला हे स्पष्ट होऊ शकलेले नसून, दहशत माजविण्यासाठी झाल्याची शक्यता वर्तवली जात आहे. पुढील तपास पोलीस करत आहेत.
