पुणे: दौंड तालुक्यातील पारगाव येथे घरगुती वादातून जावयाला सासरे आणि दोन मेहुण्यांनी मारहाण केल्याची घटना समोर आली आहे. या प्रकरणी यवत पोलीस ठाण्यात तिघांविरुद्ध गुन्हा दाखल करण्यात आला असून पोलिसांकडून पुढील तपास सुरू आहे.
पोलिसांनी दिलेल्या माहितीनुसार, आबासाहेब साहेबराव खांडेकर (वय 50, रा. पारगाव, ता. दौंड) यांनी याप्रकरणी फिर्याद दाखल केली आहे. 29 जुलै रोजी रात्री साडेनऊच्या सुमारास त्यांचा आणि त्यांच्या पत्नीचा घरगुती कारणावरून वाद झाला होता. या घटनेची माहिती पत्नीच्या माहेरच्या मंडळींना मिळाल्यानंतर त्यांनी आबासाहेब यांना पारगाव येथील बावीस फाटा परिसरात बोलावल्याचे तक्रारीत नमूद करण्यात आले आहे.
आबासाहेब खांडेकर तेथे पोहोचल्यानंतर त्यांचे मेहुणे उत्तरेश्वर दशरथ टकले, ज्ञानेश्वर दशरथ टकले आणि सासरे दशरथ दत्तात्रय टकले यांनी त्यांना जाब विचारला. पत्नीला त्रास का देत असल्याचे विचारत दोन्ही मेहुण्यांनी लाकडी बांबूने मारहाण केल्याचा आरोप करण्यात आला आहे. त्याचवेळी सासऱ्यानेही त्यांना मारहाण केल्याचे फिर्यादीत म्हटले आहे.
भररस्त्यात घडलेल्या या घटनेमुळे परिसरात काही काळ गोंधळाचे वातावरण निर्माण झाले. त्यानंतर आबासाहेब खांडेकर यांनी यवत पोलीस ठाण्यात धाव घेत तक्रार दाखल केली.
पोलिसांनी तक्रारीची दखल घेत तिन्ही आरोपींविरुद्ध भारतीय न्याय संहितेच्या (बीएनएस) संबंधित कलमान्वये गुन्हा नोंदवला आहे. या प्रकरणाचा पुढील तपास पोलीस हवालदार करे करत असून, घटनेमागील सर्व बाबींची चौकशी सुरू आहे.
