पुणे : हॉटेलमध्ये भिंतीच्या कट्ट्यावर बसण्यास मनाई केल्याच्या क्षुल्लक कारणावरून संतापलेल्या ग्राहकाने हॉटेलचालकावर धारदार सुरीने हल्ला केल्याची धक्कादायक घटना आळंदीजवळील केळगाव येथे घडली. आरोपीने हॉटेलचालकाच्या कपाळावर सुरीने वार केल्याने ते गंभीर जखमी झाले. याप्रकरणी आळंदी पोलिसांनी आरोपीला अटक केली आहे.
केशव पंढरीनाथ सोळंके (वय २६, रा. आळंदी) असे अटक करण्यात आलेल्या आरोपीचे नाव आहे. तर दत्ता चक्रधर गाढवे (वय ३०, रा. केळगाव) हे हल्ल्यात जखमी झालेले हॉटेलचालक आहेत.
सोमवारी (१० ऑगस्ट) रात्री सुमारे ११ वाजण्याच्या सुमारास केळगाव येथील ‘मैफल हॉटेल’मध्ये हा प्रकार घडला. केशव सोळंके हा हॉटेलमध्ये आला होता. यावेळी तो टेबल क्रमांक चारजवळ असलेल्या भिंतीच्या कट्ट्यावर जाऊन बसला. हॉटेलचालक दत्ता गाढवे यांनी त्याला कट्ट्यावर बसू नका, असे सांगितले.
या गोष्टीचा केशवला राग आला आणि त्याने दत्ता यांच्याशी वाद घालण्यास सुरुवात केली. त्यानंतर त्याने दत्ता यांच्या कानशिलात मारली. वाद वाढल्यानंतर आरोपीने हॉटेलच्या काउंटरवर ठेवलेली भाजी कापण्याची धारदार सुरी उचलली आणि दत्ता यांच्या कपाळावर वार केला.
हल्ल्यानंतर आरोपीने दत्ता यांच्या छातीवर नखांनी ओरखडेही मारल्याचे तक्रारीत नमूद करण्यात आले आहे. अचानक झालेल्या या हल्ल्यामुळे हॉटेलमध्ये उपस्थित ग्राहकांमध्ये घबराट निर्माण झाली.
जखमी दत्ता गाढवे यांनी यानंतर आळंदी पोलीस ठाण्यात धाव घेत तक्रार दाखल केली. पोलिसांनी तत्काळ कारवाई करत केशव सोळंके याला अटक केली असून, या प्रकरणाचा पुढील तपास सुरू आहे.
