पुणे, ता. 19 : पुणे रेल्वे स्थानकाच्या आवारातील तिकिट विक्री केंद्रात मध्यरात्री धक्कादायक लुटीचा प्रकार घडला. तिकिट विक्रीतून जमा झालेली रोकड घेऊन मुख्य कार्यालयाकडे निघालेल्या रेल्वे कर्मचाऱ्याला दोन चोरट्यांनी अडवून चाकूचा धाक दाखवला. विरोध केल्यानंतर झालेल्या झटापटीत चोरट्यांनी कर्मचाऱ्याच्या हातावर चाकूने वार करून त्याला जखमी केले. त्यानंतर सोनसाखळी, मोबाइल आणि रोकड असा तब्बल 4 लाख 91 हजार रुपयांचा मुद्देमाल घेऊन चोरटे पसार झाले.
या घटनेत केल्विन सोलोमन मायला (वय 29, रा. धायरकर कॉलनी, मुंढवा) हे जखमी झाले आहेत. त्यांनी याबाबत बंडगार्डन पोलिस ठाण्यात फिर्याद दिली असून, दोन अज्ञात चोरट्यांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, केल्विन हे पुणे रेल्वे स्थानकाच्या आवारातील तिकिट केंद्रात कार्यरत आहेत. मंगळवारी (१८ ऑगस्ट) मध्यरात्री सुमारे एकच्या सुमारास ते तिकिट विक्रीतून जमा झालेली रोकड मुख्य कार्यालयात जमा करण्यासाठी घेऊन जात होते. याच वेळी तिकिट केंद्राजवळ दबा धरून बसलेल्या दोन चोरट्यांनी त्यांना अडवले. चोरट्यांनी केल्विन यांच्या गळ्याला चाकू लावत त्यांना पुन्हा तिकिट केंद्राच्या दिशेने नेले. त्यानंतर त्यांच्याकडील ऐवज हिसकावण्याचा प्रयत्न केला. केल्विन यांनी प्रतिकार केल्याने झटापट झाली. यावेळी चोरट्यांनी त्यांच्या हातावर चाकूने वार केला.
यानंतर चोरट्यांनी केल्विन यांच्या गळ्यातील पाच तोळ्यांची सोनसाखळी, 26 हजार 685 रुपयांची रोकड आणि दोन मोबाइल संच असा एकूण 4 लाख 91 हजार रुपयांचा मुद्देमाल लुटला. एवढ्यावरच न थांबता चोरट्यांनी केल्विन यांचे हात-पाय बांधून त्यांच्या तोंडात रुमाल कोंबला आणि घटनास्थळावरून पळ काढला.
दरम्यान, काही वेळाने तिकिट केंद्रात जखमी अवस्थेत केल्विन पडल्याचे प्रवाशांच्या निदर्शनास आले. त्यांनी तातडीने पोलिसांना माहिती दिली. माहिती मिळताच पोलिस घटनास्थळी दाखल झाले आणि जखमी केल्विन यांना उपचारासाठी रुग्णालयात दाखल केले. घटनेची गंभीर दखल घेत वरिष्ठ पोलीस निरीक्षक संतोष पांढरे यांनी घटनास्थळी भेट देऊन पाहणी केली. पोलिसांनी पुणे रेल्वे स्थानक परिसरातील सीसीटीव्ही फुटेज ताब्यात घेऊन चोरट्यांचा माग काढण्यास सुरुवात केली आहे.
