पुणे, ता. २४ : दापोडी परिसरात घरगुती गॅस सिलेंडरमधून गॅस काढून ग्राहकांची फसवणूक केली जात असल्याचा प्रकार समोर आला आहे. सुरेखा कांबळे यांच्या सतर्कतेमुळे हा प्रकार उघडकीस आला. त्यांनी सिलेंडरचे वजन कमी असल्याचा संशय आल्यानंतर तत्काळ ११२ हेल्पलाइनवर संपर्क साधला. त्यानंतर ११२च्या मार्शल टीमने डिलिव्हरी पिकअप टेम्पोचा पाठलाग करून छत्रपती शिवाजी चौकात त्याला अडवले.
या कारवाईत ‘बी. डी. खांदवे एचपी गॅस एजन्सी’च्या माध्यमातून घरगुती सिलेंडरमधून गॅस काढला जात असल्याचे समोर आले. याप्रकरणी श्यामलाल बिश्नोई (वय २०, मूळ रा. जोधपूर, राजस्थान) याच्याविरोधात दापोडी पोलिस ठाण्यात गुन्हा दाखल करून त्याला अटक करण्यात आली आहे. पोलिस राजेंद्र गर्जे यांच्या फिर्यादीवरून ही कारवाई करण्यात आली.
घटनेची माहिती मिळताच वैधमापन शास्त्र विभागाचे निरीक्षक आदेश गायकवाड घटनास्थळी दाखल झाले. त्यांनी प्रमाणित वजनकाट्याच्या साहाय्याने टेम्पोमधील ४५ सिलेंडरची तपासणी केली. यावेळी त्यापैकी ३५ सिलेंडरमध्ये प्रत्येकी २ ते ४ किलो गॅस कमी असल्याचे आढळले.
कमी केलेला गॅस इतर ग्राहकांना किंवा हॉटेलचालकांना परस्पर विकण्याचा आरोपीचा डाव असल्याचे समोर आले आहे. या प्रकरणात पोलिसांनी ३ लाख रुपये किमतीचा डिलिव्हरी टेम्पो आणि १ लाख ५३ हजार रुपये किमतीचे ४५ गॅस सिलेंडर असा एकूण ४ लाख ५३ हजार रुपयांचा मुद्देमाल जप्त केला आहे.
या घटनेमुळे ग्राहकांनी घरगुती गॅस सिलेंडरची डिलिव्हरी घेताना त्याचे वजन आणि सील तपासण्याचे महत्त्व पुन्हा अधोरेखित झाले आहे.
