चाकण, ता. २४ : चाकणजवळील वडगाव घेणंद येथे सोमवारी (ता. २१) दुपारी साडेबाराच्या सुमारास थरारक घटना घडली. बेदरकारपणे वाहन चालवून एका तरुणाला धडक दिल्यानंतर, कार अडवण्यासाठी आलेल्या पोलिसांच्या अंगावरच चालकाने कार घातल्याचा प्रकार घडला. पोलीस अंमलदाराने प्रसंगावधान राखत बाजूला उडी मारल्याने त्यांचा जीव थोडक्यात बचावला. त्यानंतर कारने पोलिसांच्या सरकारी वाहनालाही जोरदार धडक दिली.
मिळालेल्या माहितीनुसार, सुखदेव हनुमंत नाईक (वय २९, मूळ रा. मिरज, सांगली) हा चारचाकी वाहन भरधाव आणि निष्काळजीपणे चालवत होता. त्याने रस्त्यावरील इतर वाहनांना धडक दिली. या घटनेत अविनाश गोविंद मोरे (वय २०, रा. मेदनकरवाडी) हा तरुण जखमी झाला.
अपघाताची माहिती मिळताच दक्षिण चाकण पोलीस ठाण्याचे पोलीस अंमलदार निरोज रज्जाक शेख (वय ४१) हे सहकाऱ्यांसह घटनास्थळी पोहोचले. त्यांनी आरोपीची कार अडवण्याचा प्रयत्न केला. मात्र, पोलिसांना समोर पाहून आरोपीने वाहन थांबवण्याऐवजी थेट पोलीस अंमलदार शेख यांच्या अंगावर कार घातली.
शेख यांनी क्षणाचाही विलंब न करता बाजूला उडी मारून स्वतःचा जीव वाचवला. त्यानंतर आरोपीने पुढे जाऊन पोलिसांच्या सरकारी वाहनाला जोरदार धडक दिली. या घटनेनंतर पोलिसांनी आरोपी सुखदेव नाईक याला जागीच पकडले.
याप्रकरणी पोलीस अंमलदार निरोज शेख यांच्या फिर्यादीवरून दक्षिण चाकण पोलीस ठाण्यात सरकारी कामात अडथळा आणणे, हत्येचा प्रयत्न करणे आणि अपघातासंदर्भात गुन्हे दाखल करण्यात आले आहेत.
