सांगली: विटा परिसरात भोंदूगिरी, अंधश्रद्धा आणि भीतीचा आधार घेत एका कुटुंबाची मानसिक, शारीरिक आणि आर्थिक फसवणूक केल्याचा गंभीर प्रकार उघडकीस आला आहे. या प्रकरणी आरोपींविरुद्ध महाराष्ट्र नरबळी आणि इतर अमानुष, अनिष्ट व अघोरी प्रथा आणि जादूटोणा प्रतिबंधक कायद्यान्वये गुन्हा दाखल करण्यात आला आहे. या घटनेमुळे परिसरात मोठी खळबळ उडाली आहे.
तक्रारदार कुटुंबाच्या माहितीनुसार, आरोपी संकेत निकम, महेश बाबर आणि सूरज उपाध्याय यांनी स्वतःकडे दैवी शक्ती असल्याचा आभास निर्माण करून कुटुंबीयांमध्ये भीती पसरवली. कुटुंबावर संकट येईल, जीवितहानी होऊ शकते किंवा वाईट शक्तींचा प्रभाव आहे, अशा प्रकारच्या दाव्यांद्वारे त्यांनी वारंवार मानसिक दबाव टाकत मोठी आर्थिक फसवणूक केल्याचा आरोप आहे.
तसेच विविध धार्मिक आणि अंधश्रद्धेशी संबंधित दावे करत कुटुंबीयांना घाबरवून त्यांचा छळ केल्याचेही समोर आले आहे. पीडितांवर मानसिक दबावासोबत मारहाणीचाही आरोप करण्यात आला आहे. यापूर्वी या प्रकरणी विटा पोलीस ठाण्यात तक्रार देण्यात आली होती, मात्र त्यावेळी गंभीर दखल घेतली गेली नव्हती.
यानंतर अंधश्रद्धा निर्मूलन समितीच्या माध्यमातून या प्रकरणाचा पाठपुरावा करण्यात आला. सामाजिक कार्यकर्ते विवेक मोहन भिंगारदेवे आणि समितीच्या सदस्यांनी पुरावे गोळा करून पोलिस प्रशासनाकडे कारवाईची मागणी केली. त्यानंतर या प्रकरणाला गती मिळाली आणि अखेर गुन्हा दाखल करण्यात आला.
दरम्यान, या प्रकरणात एका अल्पवयीन मुलीशी संबंधित गंभीर आरोपांचीही माहिती समोर आली असून त्याबाबत स्वतंत्र चौकशी सुरू आहे. पोलिसांकडून पुढील तपास सुरू असून या प्रकरणातील सर्व पैलूंची छाननी केली जात आहे.
