पुणे: पुण्यातील नन्हे परिसरातील एका खासगी रुग्णालयात उपचारासाठी आलेल्या 60 वर्षीय महिलेसोबत धक्कादायक प्रकार घडल्याची घटना समोर आली आहे. उपचारादरम्यान वेदना असह्य झाल्याने महिला ओरडल्याचा राग आल्याने डॉक्टरांनी तिच्या कानाखाली मारल्याचा आरोप करण्यात आला आहे. या प्रकरणी पीडित महिलेने पोलिसांत तक्रार दाखल केली असून पुढील तपास सुरू आहे.
मिळालेल्या माहितीनुसार, गुरुवारी संबंधित महिला आपल्या सुनेसह भुमकर चौकातील मयुरेश्वर हॉस्पिटलमध्ये उपचारासाठी गेल्या होत्या. तेथे डॉ. मयुर शंतनुराव यादव शिंदे यांनी त्यांची तपासणी करून प्लास्टर करण्यास सुरुवात केली. मात्र उपचार सुरू असताना वेदना वाढल्यामुळे महिला मोठ्याने ओरडल्या.
तक्रारीनुसार, याच कारणावरून डॉक्टर संतापले आणि त्यांनी महिलेच्या कानाखाली मारले. तसेच “पुन्हा ओरडलीस तर आणखी मारीन” अशी धमकीही दिल्याचा आरोप करण्यात आला आहे. या प्रकारामुळे घाबरलेल्या महिलेने थेट पोलिस ठाण्यात जाऊन तक्रार दाखल केली.
पोलिसांनी दिलेल्या माहितीनुसार, डॉ. मयुर शंतनुराव यादव शिंदे (वय 40, रा. स्वामी अंगण बिल्डिंग, भुमकरनगर, नन्हेगाव, पुणे) यांच्याविरुद्ध तक्रारीची नोंद करण्यात आली असून घटनेचा तपास सुरू आहे.
दरम्यान, ही घटना समोर आल्यानंतर परिसरातील नागरिकांमध्ये तीव्र नाराजी व्यक्त होत आहे. उपचारासाठी आलेल्या रुग्णाशी अशा प्रकारे वागणे गंभीर आणि निंदनीय असल्याचे मत ग्रामस्थांनी व्यक्त केले. अनेकांनी संबंधित डॉक्टरवर कठोर कायदेशीर कारवाई करण्याची मागणी केली आहे.
याबाबत विचारणा केली असता संबंधित डॉक्टरांनी उपचारादरम्यान रुग्णाला नियंत्रित करण्यासाठी अशा प्रकारची हाताळणी करणे हे प्रशिक्षणाचा भाग असल्याचे स्पष्टीकरण दिले. मात्र या दाव्यावरही नागरिकांनी आक्षेप घेतला असून हा प्रकार वैद्यकीय नैतिकतेला काळिमा फासणारा असल्याची प्रतिक्रिया व्यक्त केली जात आहे. या प्रकरणामुळे रुग्णांच्या सुरक्षिततेचा आणि डॉक्टर-रुग्ण नात्यातील विश्वासाचा मुद्दा पुन्हा एकदा चर्चेत आला आहे.
