पुणे: डेक्कन जिमखाना परिसरात जुन्या वादातून 19 वर्षीय तरुणावर प्राणघातक हल्ला केल्याची घटना समोर आली आहे. या प्रकरणात पोलिसांनी एका प्रसिद्ध रीलस्टार तरुणीसह तीन जणांना अटक केली आहे. 15 ऑगस्टच्या पहाटे हॉटेलबाहेर घडलेल्या या प्रकारामुळे परिसरात खळबळ उडाली आहे.
जखमी तरुणाचे नाव अथर्व प्रमोद जगताप (वय 19, रा. आंबेगाव) असे आहे. मिळालेल्या माहितीनुसार, शनिवारी पहाटे सव्वातीनच्या सुमारास अथर्व ‘फ्लाइंग जिप्सी’ हॉटेलमधून बाहेर पडत होता. त्यावेळी काही जणांनी त्याला रस्त्यात अडवून जुन्या वादाचा राग काढत धमकावल्याचा आरोप आहे.
परिस्थिती पाहून अथर्वने स्वतःचा बचाव करण्यासाठी पुन्हा हॉटेलच्या आत जाण्याचा प्रयत्न केला. मात्र आरोपींनी त्याचा पाठलाग केला. त्यानंतर त्याच्या डोक्यावर शस्त्राने वार करण्यात आल्याचे तक्रारीत नमूद आहे. याशिवाय हॉटेलमधील खुर्ची त्याच्यावर फेकण्यात आली आणि लाथाबुक्क्यांनी मारहाण केल्याचा आरोपही करण्यात आला आहे.
हल्ल्यानंतर अथर्वने डेक्कन पोलीस ठाण्यात धाव घेत तक्रार दाखल केली. त्यानंतर पोलिसांनी तपास करत माधवी कुंभार (रा. हडपसर), स्नेहल सोनके (रा. पिंपळे गुरव) आणि शार्दुल ओव्हाळ (रा. हडपसर) या तिघांना अटक केली. यामध्ये माधवी कुंभार ही रीलस्टार असल्याचे समोर आले आहे.
पोलिसांच्या माहितीनुसार, अथर्व आणि आरोपींची आधीपासून ओळख होती. काही महिन्यांपूर्वी सातारा येथे त्यांच्यात वाद झाल्याचे समोर आले आहे. याच जुन्या वादातून पुण्यात हा हल्ला झाल्याचा प्राथमिक संशय आहे.
दरम्यान, या प्रकरणात आणखी 7 ते 8 जणांविरोधात गुन्हा दाखल करण्यात आला आहे. संबंधित हॉटेल आणि परिसरात यापूर्वीही गोंधळ व मारामारीच्या घटना घडत असल्याने स्थानिक नागरिकांनी नाराजी व्यक्त केली आहे.
