पुणे: पुण्यातील कोंढवा परिसरातील एका 53 वर्षीय व्यावसायिकाची डेटिंग ॲपच्या माध्यमातून मोठी सायबर फसवणूक झाल्याची धक्कादायक घटना समोर आली आहे. चलन व्यापारात (करन्सी ट्रेडिंग) मोठा परतावा मिळण्याचे आमिष दाखवत सायबर चोरट्यांनी तब्बल 7 कोटी 7 लाख 61 हजार 876 रुपयांचा गंडा घातल्याचा प्रकार उघड झाला आहे. या प्रकरणी पुणे सायबर पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार व्यावसायिक कोंढवा परिसरात राहतात आणि भोसरी एमआयडीसी भागात वाहनांच्या स्पेअर पार्ट्स निर्मितीचा कारखाना चालवतात. 2025 मध्ये एका डेटिंग ॲपवरून त्यांची एका महिलेशी ओळख झाली. संभाषणादरम्यान संबंधित महिलेने करन्सी ट्रेडिंगमध्ये गुंतवणूक केल्यास मोठा नफा मिळू शकतो, असे सांगत त्यांचा विश्वास संपादन केला.
यानंतर सायबर चोरट्यांनी तक्रारदारांना एका संकेतस्थळाची लिंक पाठवून खाते उघडण्यास सांगितले. सुरुवातीला गुंतवलेल्या रकमेवर मोठा नफा होत असल्याचे दिसत होते. त्यामुळे विश्वास बसल्यानंतर तक्रारदारांनी टप्प्याटप्प्याने विविध बँक खात्यांमध्ये मोठी रक्कम जमा केली.
मात्र, पैसे परत काढण्याचा प्रयत्न केला असता, चोरट्यांनी वेगवेगळी कारणे सांगत आणखी रक्कम भरण्याची मागणी केली. अखेर फसवणूक झाल्याचे लक्षात आल्यानंतर व्यावसायिकाने पुणे सायबर पोलिसांकडे तक्रार दाखल केली.
ही घटना 20 ऑक्टोबर 2025 ते 26 एप्रिल 2026 या कालावधीत ऑनलाइन घडल्याची माहिती समोर आली आहे. पुणे सायबर पोलिसांनी फसवणूक आणि माहिती तंत्रज्ञान कायद्यांतर्गत गुन्हा दाखल करून तपास सुरू केला आहे. सायबर गुन्हेगार सोशल मीडिया आणि डेटिंग ॲपचा वापर करून अशा प्रकारे आर्थिक फसवणूक करत असल्याने नागरिकांनी अधिक सतर्क राहण्याचे आवाहन केले जात आहे.
