पुणे : हडपसर ते घोरपडीदरम्यानच्या तिसऱ्या रेल्वे मार्गाचे कार्यान्वयन करण्यासाठी पुणे विभागाकडून १९ सप्टेंबर ते ४ ऑक्टोबर २०२६ या कालावधीत मेगा पायाभूत सुविधा ब्लॉक घेण्यात येणार आहे. पुणे आणि हडपसर यार्डमध्ये अभियांत्रिकी, सिग्नल व दूरसंचार तसेच ओव्हरहेड उपकरणांशी संबंधित महत्त्वाची कामे या काळात केली जाणार आहेत. त्यामुळे पुणे विभागातील रेल्वे वाहतुकीवर मोठा परिणाम होणार असून, रेल्वे प्रशासनाने काही गाड्या रद्द, काहींचे मार्ग बदलण्यासह काही गाड्यांचा प्रवास अंशतः सुरू किंवा समाप्त करण्याचा निर्णय घेतला आहे.
या मेगा ब्लॉकमुळे एकूण ४२ रेल्वे गाड्या रद्द करण्यात आल्या आहेत. यामध्ये पुणे-सोलापूर, पुणे-नागपूर, पुणे-सीएसएमटी, पुणे-बारामती, पुणे-दौंड, पुणे-सातारा, पुणे-शिर्डी यांसह विविध एक्सप्रेस, डेमू आणि उपनगरीय गाड्यांचा समावेश आहे. पुणे-दौंड डेमू आणि दौंड-पुणे डेमूच्या काही फेऱ्या १९ सप्टेंबर ते ४ ऑक्टोबरदरम्यान रद्द राहणार आहेत. तसेच ४ ऑक्टोबर रोजी पुणे-लोणावळा मार्गावरील काही उपनगरीय गाड्याही रद्द करण्यात आल्या आहेत.
या काळात २५ रेल्वे गाड्यांच्या मार्गातही बदल करण्यात आला आहे. पुणे-हावडा, पुणे-जम्मू तवी, पुणे-नागपूर, पुणे-बनारस, सीएसएमटी-चेन्नई, निजामुद्दीन-वास्को-द-गामा यांसह विविध गाड्या लोणावळा, कर्जत, पनवेल, कल्याण, इगतपुरी, मनमाड तसेच दौंड, कुर्डुवाडी, मिरज आणि सोलापूरमार्गे वळवण्यात येणार आहेत.
काही गाड्यांचा प्रवास पूर्ण पुण्यापर्यंत न होता खडकी, दौंड, जेजुरी, सातारा, हडपसर किंवा शिवाजीनगर येथे समाप्त केला जाणार आहे. संबंधित गाड्यांचा पुढील प्रवास या स्थानकांवरून सुरू करण्यात येणार आहे. या बदलांमुळे प्रवाशांना आपल्या गाडीच्या नेमक्या स्थानकाची आणि वेळेची माहिती घेऊनच प्रवासाचे नियोजन करावे लागणार आहे.
याशिवाय काही रेल्वे गाड्यांचे पाटस-उरुळी, चिंचवड-खडकी, दौंड-लोणी आणि दौंड-उरुळी या मार्गांवर नियमन करण्यात येणार आहे. काही गाड्यांना ३० मिनिटांपासून ते सुमारे एक तास ४० मिनिटांपर्यंत विलंब होण्याची शक्यता आहे. तसेच पुणे, हडपसर आणि सीएसएमटी येथून सुटणाऱ्या काही गाड्यांच्या वेळेतही बदल करण्यात आला आहे.
रेल्वे प्रशासनाने प्रवाशांना प्रवासाला निघण्यापूर्वी संबंधित गाडीची अद्ययावत परिचालन स्थिती आणि सुधारित वेळापत्रक तपासण्याचे आवाहन केले आहे. यासाठी भारतीय रेल्वेच्या चौकशी संकेतस्थळावर किंवा अधिकृत NTES अॅपवर माहिती तपासता येणार आहे. हडपसर-घोरपडी तिसऱ्या मार्गाचे काम पूर्ण झाल्यानंतर भविष्यात रेल्वे परिचालनाची सुरक्षितता, वेग आणि कार्यक्षमता वाढण्यास मदत होणार असल्याचे रेल्वे प्रशासनाने स्पष्ट केले आहे.
