अमित मुंडीक
पुणे: पुणे (Pune News) शहरात नवीन वर्ष 2026 च्या स्वागतासाठी होणारी संभाव्य गर्दी लक्षात घेऊन वाहतूक विभागाने मोठा निर्णय घेतला आहे. दिनांक 31 डिसेंबर रोजी सायंकाळपासून शहरातील कॅम्प आणि डेक्कन यांसारख्या मुख्य भागात वाहतुकीत महत्त्वाचे बदल करण्यात आले आहेत. महात्मा गांधी रोड, फर्ग्युसन कॉलेज रोड आणि जंगली महाराज रोडवर नागरिकांची मोठी गर्दी होत असल्याने वाहतूक कोंडी टाळण्यासाठी पोलीस प्रशासनाने महत्वाचे आदेश जारी केले आहेत. या बदलांमुळे वाहनचालकांना पर्यायी मार्गांचा अवलंब करावा लागणार आहे.
या नियोजित बदलांनुसार 31 डिसेंबर रोजी सायंकाळी 7:00 वाजल्यापासून ते 01 जानेवरी रोजी सकाळी 5:00 वाजेपर्यंत काही रस्ते नो-व्हेईकल झोन म्हणून घोषित करण्यात आले आहेत. यामध्ये डेक्कन परिसरातील गुडलक चौक ते फर्ग्युसन कॉलेज मेन गेट आणि कॅम्प भागातील एम. जी. रोडवरील 15 ऑगस्ट चौक ते अरोरा टॉवर या मार्गांचा समावेश आहे. या काळात या रस्त्यांवर कोणत्याही प्रकारच्या वाहनांना प्रवेश दिला जाणार नाही. तसेच 15 ऑगस्ट चौक, गुडलक चौक, खंडोजीबाबा चौक आणि महावीर चौक यांसारख्या महत्त्वाच्या चौकांमधील वाहतूक इतर मार्गांवर वळवण्यात येणार आहे.
वाहतूक विभागाने दिलेल्या माहितीनुसार 31 डिसेंबर च्या मध्यरात्री 12:01 पासून ते 01 जानेवरीच्या रात्री 12:00 वाजेपर्यंत शहराच्या अंतर्गत भागात सर्व प्रकारच्या जड आणि अवजड वाहनांना प्रवेशबंदी असेल. यामध्ये ट्रक, डंपर, मिक्सर आणि जेसीबी यांसारख्या वाहनांचा समावेश आहे. नवीन वर्षाच्या पार्श्वभूमीवर शहरात शांतता आणि सुव्यवस्था राखण्यासाठी ही खबरदारी घेण्यात आली आहे. नागरिकांनी प्रवासाचे नियोजन करताना या नियमांचे पालन करावे असे आवाहन करण्यात आले आहे.
वाहतूक पोलीस उप आयुक्त हिंमत जाधव यांनी दिलेल्या माहितीनुसार मद्यपान करून वाहन चालवणाऱ्यांविरुद्ध कडक कारवाई करण्यासाठी विशेष मोहीम राबवली जाणार आहे. ठिकठिकाणी ड्रंक अँड ड्राईव्हची तपासणी केली जाईल. सुरक्षित प्रवासासाठी नागरिकांनी प्रशासनाला सहकार्य करावे आणि वाहतुकीच्या नियमांचे काटेकोरपणे पालन करावे असे आवाहन करण्यात आले आहे. शहराच्या विविध भागांत पोलीस बंदोबस्त तैनात करण्यात आला असून नियमांचे उल्लंघन करणाऱ्यांवर कायदेशीर कारवाई करण्याचा इशाराही देण्यात आला आहे.
