Pune News : पुणे : शहरात मेट्रोचे जाळे हळूहळू वाढत असून नागरिकांच्या प्रवासात मोठी सोय होत आहे. यामुळे विशेषतः नोकरदार वर्गाला दिलासा मिळत आहे. या पार्श्वभूमीवर मावळ तालुक्यातील वाहतूक समस्या सोडवण्यासाठी नवीन मेट्रो मार्गांना मंजुरी देण्याची मागणी पुढे आली आहे.
हिंजवडी ते तळेगाव–नवलाख उंब्रे एमआयडीसी तसेच निगडी ते लोणावळा या नव्या मेट्रो मार्गांना मंजुरी देण्यात यावी, अशी मागणी करण्यात आली आहे. यासाठी संबंधित प्रतिनिधींनी मुख्यमंत्री देवेंद्र फडणवीस यांची भेट घेऊन प्रस्ताव मांडला आहे. या मार्गांमुळे औद्योगिक आणि पर्यटन क्षेत्राला मोठा फायदा होईल, असा विश्वास व्यक्त केला जात आहे.
मावळ तालुक्यातील तळेगाव–नवलाख उंब्रे एमआयडीसी परिसर हा मोठा औद्योगिक केंद्र म्हणून विकसित झाला आहे. येथे अनेक कंपन्या आणि उद्योग सुरू असल्याने दररोज हजारो कामगार आणि अधिकारी ये-जा करतात. हिंजवडी, पिंपरी-चिंचवड आणि आसपासच्या भागातून मोठ्या प्रमाणात लोक या परिसरात कामासाठी येतात.
मात्र, वाढत्या वाहतुकीमुळे रस्त्यांवर प्रचंड ताण निर्माण झाला आहे. सकाळ आणि संध्याकाळच्या वेळी वाहतूक कोंडी मोठ्या प्रमाणात होत असून नागरिकांना तासन्तास अडकून राहावे लागते. यामुळे वेळ आणि इंधन दोन्ही वाया जात असून उद्योग क्षेत्रालाही आर्थिक फटका बसत आहे.
निगडी ते लोणावळा मेट्रो मार्ग सुरू झाल्यास मावळ तालुक्यातील पर्यटनाला चालना मिळेल. तसेच नवीन निवासी प्रकल्प आणि वाढती लोकसंख्या लक्षात घेता सक्षम सार्वजनिक वाहतूक व्यवस्था उभारण्याची गरज वाढली आहे.
या नव्या मेट्रो प्रकल्पांना मंजुरी मिळाल्यास वाहतूक कोंडी कमी होऊन नागरिकांचा प्रवास सोयीचा होईल. तसेच उद्योग, रोजगार आणि स्थानिक विकासाला मोठी गती मिळेल, असे मत व्यक्त केले जात आहे.
