पुणे : उतारवयात आधाराची गरज (Pune News) असलेल्या 80 वर्षीय महिलेला शिळेपाके (Pune Crime) आणि आंबट अन्न देणे, मानसिक त्रास देणे आणि घरातून निघून जाण्यास सांगणे, हा कौटुंबिक हिंसाचार असल्याचे स्पष्ट करत पुण्यातील प्रथमवर्ग न्यायदंडाधिकारी अमोल शिंदे यांनी महिलेला न्याय दिला आहे. या प्रकरणात मुलगा आणि सुनेला प्रत्येकी दोन लाख रुपये भरपाई देण्याचा आदेश देत न्यायालयाने वृद्ध महिलेला घरातून बाहेर काढण्यासही स्पष्ट मनाई केली आहे.
या खटल्याच्या सुनावणीवेळी न्यायालयाने नमूद केले की, वृद्ध महिलेला मानसिक छळ सहन करावा लागला असून यामुळे तिच्या स्वाभिमान आणि मूलभूत मानवी हक्कांचे उल्लंघन झाले आहे. त्यामुळे आर्थिक भरपाई हा शिक्षा आणि न्यायाचा आवश्यक भाग असल्याचे न्यायालयाने म्हटले आहे. तसेच मुलगा, सून किंवा त्यांच्या नातेवाईकांनी कोणत्याही प्रकारे त्रास देऊ नये, आणि महिलेचा घरात राहण्याचा हक्क अबाधित ठेवावा, असेही न्यायालयाने स्पष्ट निर्देश दिले आहेत.
महिलेने कौटुंबिक हिंसाचारापासून संरक्षण कायद्यांतर्गत न्यायालयात तक्रार दाखल केली होती. ॲड. स्मिता देशमुख यांनी तक्रारदार महिलेची बाजू मांडली. तक्रारदारांचा मुलगा एका कंपनीत उच्चपदस्थ अधिकारी तर सून बँकेत नोकरीला आहे. तरीही घरी स्वतःला मोलकरणीसारखे राबवले जाते आणि सतत त्रास दिला जातो, अशा स्वरूपाचे आरोप ज्येष्ठ महिलेने केले होते. सुनेने तक्रारीस विरोध करत अर्ज फेटाळण्याची मागणी केली होती; मात्र तिने सासूची उलटतपासणी केली नसल्याने आरोप खरे असल्याचे न्यायालयाने नमूद केले.
