पुणे: पुण्यात शिक्षणासाठी आलेल्या बी-टेकच्या विद्यार्थ्याने (Pune News) झगमगाटी जीवनशैलीच्या नादात स्वतःच्याच घरातून सोन्याचे दागिने लांबवून खोटा चोरीचा बनाव रचल्याचा धक्कादायक प्रकार उघडकीस आला आहे. धुळे जिल्ह्यातील साक्री येथील सुयोग कॉलनीतील या घटनेने परिसरात मोठी खळबळ उडाली आहे. (Breaking News)
३० नोव्हेंबरच्या संध्याकाळी घराचे कुलूप तोडून ८ ते ९ तोळे सोन्याचे दागिने चोरीला गेल्याची तक्रार भावेश संजय नेरकर या २० वर्षाच्या विद्यार्थ्याने पोलिसांकडे केली होती. पण तपास जसजसा पुढे गेला, तसतसा या कथित घरफोडीचा गुन्हा बनावट असल्याचे समोर आले. पुण्यात राहून बी-टेक करताना झालेल्या खर्च, हौस आणि पार्ट्यांसाठी पैसे लागल्याने भावेशने दोन साथीदारांसोबत मिळून आपल्या घरातूनच दागिने चोरल्याचे पोलीस तपासात निष्पन्न झाले.
तपासादरम्यान पोलिसांनी भावेश आणि त्याच्या दोन्ही साथीदारांना ताब्यात घेतले. चोरलेले दागिनेही जप्त करण्यात आले असून, दोन तोळे सोने सराफाकडे विकले असल्याचे, तर अर्धा तोळा सोने शेतात पुरून ठेवल्याचे उघड झाले आहे. पुण्यातील ग्लॅमर, महागडे शौक आणि झगमगत्या जीवनशैलीची नक्कल करण्यासाठी हा प्रकार घडवून आणल्याचा पोलिसांचा संशय आहे.
या घटनेमुळे साक्री शहरात एकच खळबळ उडाली आहे. तरुण पिढीवर वाढत्या वाईट प्रभावांबद्दल चिंता व्यक्त होत असून, सोशल मीडियावर दिसणाऱ्या दिखावू जीवनशैलीचा परिणाम कुटुंबांवर होऊ लागल्याचे नागरिक सांगत आहेत. धुळे जिल्ह्यात गेल्या काही महिन्यांत तरुणांकडून चोरी, फसवणूक आणि वळणाऱ्या वर्तनाच्या घटना वाढल्या आहेत, हेही लक्षात येत आहे.
या प्रकरणाचा पुढील तपास उपविभागीय पोलीस अधिकारी बांबळे, पोलीस निरीक्षक वळवी आणि पोलीस उपनिरीक्षक महेश घायतड करत आहेत. तरुणाने स्वतःच्याच घरात चोरीचा नाटक करून पोलिसांना दिशाभूल करण्याचा प्रयत्न केल्याने कठोर कारवाईची शक्यता असून, अशी पुनरावृत्ती टाळण्यासाठी जनजागृतीची गरज असल्याचे सामाजिक कार्यकर्ते सांगत आहेत.
