पुणे: पुण्यात वाहनचालकांसाठी (Pune Driving License) घरपोच ड्रायव्हिंग लायसन्स आणि आरसी बुक मिळवणे आता थोडे महाग झाले आहे. परिवहन विभागाने टपाल विभागासोबत करार करून ही सेवा सुरू (RC Book Home Delivery) ठेवली असली तरी घरपोच सेवेसाठी लागणाऱ्या शुल्कात वाढ करण्यात (RTO Pune News) आली आहे. यापूर्वी या सेवेसाठी नागरिकांना 58 रुपये भरावे लागत होते, मात्र आता त्यासाठी 70 रुपये मोजावे लागणार आहेत. (Latest Marathi News)
ड्रायव्हिंग लायसन्ससाठी परीक्षा दिल्यानंतर किंवा नवीन वाहन खरेदी केल्यानंतर ही घरपोच सेवा लागू होते. या सेवेमुळे नागरिकांना कार्यालयात रांगेत थांबण्याची गरज राहत नाही आणि वेळेची बचत होते. लायसन्स किंवा आरसी बुक थेट घरच्या पत्त्यावर पोहोचत असल्यामुळे अनेक वाहनचालक या सेवेचा लाभ घेत आहेत.
परिवहन विभागाचे उपप्रादेशिक अधिकारी स्वप्नील भोसले यांनी सांगितले की, परिवहन विभागाच्या सूचनेनुसार घरपोच सेवेसाठीचे शुल्क वाढवणे आवश्यक होते. टपाल विभागासोबत असलेल्या करारामुळे ही सेवा सुरक्षित आणि वेळेत मिळते. नागरिकांना त्यांच्या महत्त्वाच्या कागदपत्रांची खात्रीशीर डिलिव्हरी होते, त्यामुळे ही सेवा उपयुक्त ठरत आहे.
हा नवा दर 1 जानेवारीपासून लागू करण्यात आला आहे. त्यामुळे आता ड्रायव्हिंग लायसन्स किंवा आरसी बुक घरपोच मिळवण्यासाठी नागरिकांना 70 रुपये शुल्क भरावे लागणार आहे. या निर्णयाची अंमलबजावणी पुण्यासह राज्यातील अनेक शहरांमध्ये सुरू झाली आहे.
घरपोच सेवा ही वाहनधारकांसाठी सोयीची असली तरी वाढलेल्या शुल्कामुळे नागरिकांच्या खिशावर थोडा भार पडणार आहे. तरीही सरकारी कार्यालयातील गर्दी, वेळेचा अपव्यय आणि वारंवार फेऱ्या टाळण्यासाठी अनेक वाहनचालक ही सेवा घेण्यास प्राधान्य देत आहेत. त्यामुळे पुण्यातील वाहनधारकांसाठी ही सेवा उपयुक्त ठरत असली तरी आता ती थोडी महाग झाल्याचे चित्र आहे.
