पुणे: बाणेर परिसरात (Pune Crime) झालेल्या घरफोडी प्रकरणातील फरार (Pune News) आरोपीला पोलिसांनी आसाममधील गुवाहाटी शहरातून अटक केली आहे. या कारवाईत चोरीस गेलेला लॅपटॉप, मोबाईल फोन आणि एटीएम कार्डे असा एकूण 35 हजार रुपयांचा मुद्देमाल पोलिसांनी जप्त केला आहे.
या प्रकरणी बाणेर पोलीस ठाण्यात गुन्हा क्रमांक 216/2025 भादंवि कलम 305 अंतर्गत गुन्हा दाखल करण्यात आला होता. फिर्यादी यांच्या अनुपस्थितीत घराचा दरवाजा उघडा असल्याची संधी साधून अज्ञात चोरट्याने घरात प्रवेश केला होता. त्याने घरातून पाच मोबाईल फोन, एक लॅपटॉप, पाच एटीएम कार्डे आणि 3,000 रुपये रोख रक्कम असा एकूण 73,000 रुपयांचा ऐवज चोरून नेला होता.
तपासादरम्यान पोलिसांना मिळालेल्या गुप्त माहितीनुसार आरोपी सुरुवातीला कोलकात्यात लपल्याचे समजले. त्यानुसार सहायक पोलीस निरीक्षक के. बी. डाबेराव यांच्या नेतृत्वाखालील पथक तेथे रवाना झाले. मात्र पुढील तपासात आरोपी आसाममधील गुवाहाटीकडे गेल्याचे स्पष्ट झाल्यानंतर पथकाने तातडीने मोर्चा वळवला आणि मोहम्मद इमरान इरफान शेख (वय 24, रा. मलीकापूर गल्लीपुरा प्यादया पाडा, कोलकाता) याला अटक करण्यात यश मिळवले.
चौकशीत आरोपीने चोरी केलेला लॅपटॉप कोलकात्यातील चांदणी मार्केटमध्ये विकल्याची कबुली दिली. त्यानुसार पोलिसांनी तो लॅपटॉप खरेदी करणारा शेख अफताब अली (वय 30, रा. कॉलीन स्टेट, कोलकाता) यालाही अटक करून न्यायालयासमोर हजर केले. पोलिसांनी या कारवाईत लॅपटॉप, मोबाईल फोन आणि एटीएम कार्डे असा 35 हजार रुपयांचा मुद्देमाल जप्त केला आहे.
या मोहिमेत अपर पोलीस आयुक्त मनोज पाटील, उपपोलीस आयुक्त सोमय मुंडे, सहाय्यक पोलीस आयुक्त विठ्ठल दबडे यांच्या मार्गदर्शनाखाली वरिष्ठ पोलीस निरीक्षक चंद्रशेखर सावंत आणि पोलीस निरीक्षक (गुन्हे) अलका सरग यांनी पथकाला आवश्यक दिशा-निर्देश दिले होते. कारवाईत सहायक पोलीस निरीक्षक के. बी. डाबेराव, पोलीस अंमलदार बाबा आहेर, किसन शिंगे, गणेश गायकवाड, अतुल इंगळे, गजानन अवातिरक, प्रदीप खरात, प्रितम निकाळजे, शरद राऊत आणि रोहित पाथरुट यांनी सक्रिय सहभाग नोंदवला.
