अमित मुंडीक
पुणे : निलेश घायवळ टोळीशी (Nilesh Ghaiwal) संबंधित गंभीर स्वरूपाच्या मोका गुन्ह्यातील पाहिजे आरोपी बाबू उर्फ प्रफुल संभाजी पिसाळ याला कोथरूड पोलिसांनी यशस्वीपणे (Pune Crime) अटक केली आहे. कोथरूड पोलीस स्टेशन गुन्हा रजिस्टर नंबर 00/2025 (वारजे पोलीस स्टेशन) व 277/2025 (कोथरूड पोलीस स्टेशन) अंतर्गत दाखल गुन्ह्यात आरोपीवर भारतीय न्याय संहिता 2023 सह शस्त्र अधिनियम आणि क्रिमिनल लॉ अमेंडमेंटमधील विविध गंभीर कलमे लावण्यात आलेली आहेत. (Latest Marathi News)
बाबू उर्फ प्रफुल पिसाळ हा मूळचा कोथरूड येथील हिल व्ह्यू सोसायटी, संस्कृती कुंज अपार्टमेंट, पौड रोड येथील रहिवासी असून तो सध्या लोणी काळभोर येथील खोकलाई चौक परिसरात लपून राहत असल्याची माहिती गुप्त बातमीदारामार्फत पोलीस शिपाई विष्णू राठोड व पोलीस शिपाई आकाश वाल्मिकी यांना मिळाली होती. या खात्रीशीर माहितीच्या आधारे वरिष्ठ अधिकाऱ्यांच्या आदेशानुसार पोलिसांनी सापळा रचून आरोपीला ताब्यात घेतले.
ही कारवाई पोलीस उपायुक्त संभाजी कदम (परिमंडळ ३, पुणे शहर), सहाय्यक पोलीस आयुक्त शीतल जानवे (कोथरूड विभाग), वरिष्ठ पोलीस निरीक्षक संदीप देशमाने व पोलीस निरीक्षक (गुन्हे) अनिल माने यांच्या मार्गदर्शनाखाली पार पडली. तपास पथकात पोलीस उपनिरीक्षक मोहन चव्हाण, पोलीस शिपाई आकाश वाल्मिकी, विष्णू राठोड, मंगेश शेळके, मयूर पांढरे व प्रवीण मांडवकर यांचा समावेश होता.
मोका गुन्ह्यातील पाहिज्या आरोपीच्या अटकेमुळे कोथरूडसह पुणे शहरातील गुन्हेगारी टोळ्यांविरोधातील कारवाईला मोठे यश मिळाल्याची चर्चा असून, पोलिसांच्या या धडक कारवाईचे सर्वत्र कौतुक होत आहे.
