Pune Crime: पुणे: सहा राज्यांमध्ये घरफोड्या करत पोलिसांना चकवा देणाऱ्या एका बाइकरला अखेर अटक करण्यात आली आहे. उत्तर प्रदेशातील मिर्झापूर येथे पोलिसांनी ही कारवाई केली. मोहम्मद बशार नूर मोहम्मद (वय 38) उर्फ नेवनाथ विनोद कुमार असे आरोपीचे नाव असून, तो मूळचा बांगलादेशचा असून सध्या तेलंगणामध्ये राहत होता. देशभरात 50 पेक्षा अधिक घरफोड्या केल्याचा संशय पोलिसांनी व्यक्त केला आहे.
कर्वेनगर परिसरातील ‘द टेरिटरी ऑफिस’ येथे 14 ते 15 मार्च दरम्यान घरफोडी झाली होती. या घटनेत सुमारे 6 लाख 71 हजार रुपयांचा ऐवज चोरीला गेला होता. यात कॅमेरा, लेन्स, ड्रोन, आयफोन आणि इतर महागड्या वस्तूंचा समावेश होता. या प्रकरणी अलंकार पोलिसांनी तपास सुरू केला.
तपासादरम्यान सीसीटीव्ही फुटेजमध्ये आरोपी रॉयल एनफिल्ड हिमालयन दुचाकीवर फिरताना दिसला. चोरीतील आयफोनच्या लोकेशनच्या मदतीने पोलिसांनी त्याचा माग काढला. आरोपी सतत राज्य बदलत असल्याचे लक्षात आले. तो हैदराबाद, चंद्रपूर, नागपूर, जबलपूर मार्गे उत्तर प्रदेशात पोहोचल्याचे उघड झाले.
पुणे पोलिसांनी इतर राज्यांच्या पोलिसांशी संपर्क साधत सापळा रचला. वाराणसी पोलिसांच्या मदतीने मिर्झापूर येथे आरोपीला पकडण्यात आले. त्याच्याकडून बांगलादेशी पासपोर्ट आणि विविध देशांची चलने जप्त करण्यात आली आहेत.
आरोपी बनावट ओळखपत्रांचा वापर करून वेगवेगळ्या नावांनी गुन्हे करत होता. त्याच्याविरुद्ध आंध्र प्रदेश आणि तेलंगणामध्येही अनेक गुन्हे दाखल आहेत. पुढील तपास सुरू असून आणखी गुन्हे उघड होण्याची शक्यता पोलिसांनी व्यक्त केली आहे.
