Pune Crime : पुणे : पुणे शहरात काँग्रेस प्रदेशाध्यक्ष हर्षवर्धन सपकाळ (Harshvardhan Sapkal Statement Row) यांच्या एका वक्तव्यामुळे राजकीय वातावरण तापले आहे. छत्रपती शिवाजी महाराज आणि टीपू सुलतान यांच्या कार्याची तुलना करणाऱ्या विधानाचा तीव्र निषेध करण्यात येत असून या मुद्द्यावरून भाजप आणि काँग्रेस कार्यकर्ते आमने-सामने आले. या निषेध आंदोलनादरम्यान मोठा गोंधळ झाला असून त्यानंतर पोलिसांनी दोन्ही पक्षांच्या नेत्यांवर आणि कार्यकर्त्यांवर गुन्हे दाखल केले आहेत. (Pune BJP Congress Clash)
भाजप कार्यकर्त्यांनी या विधानाचा निषेध करण्यासाठी शहरात आंदोलन केले. आंदोलनावेळी काँग्रेस कार्यालयासमोर मोठी गर्दी जमली होती. काही आंदोलकांनी कार्यालयात प्रवेश करण्याचा प्रयत्न केल्याने दोन्ही बाजूंचे कार्यकर्ते समोरासमोर आले. या दरम्यान जोरदार घोषणाबाजी झाली आणि परिस्थिती चिघळली. काही वेळातच आंदोलनाला हिंसक वळण लागले आणि दगडफेक झाल्याचेही पाहायला मिळाले. या घटनेत काँग्रेसच्या एका महिला कार्यकर्त्या जखमी झाल्याचा आरोप करण्यात आला आहे.
या गोंधळानंतर पोलिसांनी तातडीने हस्तक्षेप करत परिस्थिती नियंत्रणात आणली. दोन्ही पक्षांच्या कार्यकर्त्यांनी एकमेकांविरोधात तक्रारी दिल्यानंतर पुण्यातील दोन वेगवेगळ्या पोलीस ठाण्यांमध्ये गुन्हे दाखल करण्यात आले आहेत. भाजप शहराध्यक्ष धीरज घाटे आणि युवा मोर्चाचे शहराध्यक्ष दुष्यंत मोहोळ यांच्यासह सुमारे 100 जणांवर विश्रामबाग पोलीस ठाण्यात गुन्हा दाखल झाला आहे. तर भाजपने दिलेल्या तक्रारीनंतर अरविंद शिंदे आणि प्रशांत जगताप यांच्यासह इतर काँग्रेस कार्यकर्त्यांवर शिवाजीनगर पोलीस ठाण्यात गुन्हा दाखल करण्यात आला आहे.
या घटनेमुळे पुण्यातील राजकीय वातावरण चांगलेच तापले असून कायदा आणि सुव्यवस्था राखण्यासाठी पोलिसांनी कडक बंदोबस्त ठेवला आहे. पुढील तपास सुरू असून दोषींवर कडक कारवाई केली जाईल, असे पोलिसांकडून सांगण्यात आले आहे.
