Pune Crime : उरुळी कांचन, ता. 16 : घरगुती भांडणाच्या रागातून सासऱ्याने जावयाला शिवीगाळ करुन खोऱ्याच्या लाकडी दांडक्याने मारहाण केल्याची घटना घडली आहे. उरुळी कांचन (ता. हवेली) ग्रामपंचायत हद्दीतील ढगेमळा परिसरात गुरुवारी (ता. 12) रात्री दहा वाजण्याच्या सुमारास घडली आहे. याप्रकरणी पत्नीसह तिघांवर उरुळी कांचन पोलीस ठाण्यात गुन्हा दाखल करण्यात आला आहे.
पत्नी गौरी किरण कांचन (रा. ढगे मळा, उरुळी कांचन, ता. हवेली) सासरे अशोक तिकोने (पूर्ण नाव माहित नाही) व अशोक तिकोने याचा मित्र राजू शिनगारे (रा. दोघेही अप्पर इंदिरानगर, उरुळी कांचन, ता. हवेली) अशी गुन्हा दाखल करण्यात आलेल्या तिघांची नावे आहेत. याप्रकरणी किरण रखमाजी कांचन (वय -35, रा. ढगेमळा, उरुळी कांचन) यांनी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, गुरुवारी रात्री दहा वाजण्याच्या सुमारास फिर्यादी किरण कांचन हे त्यांच्या राहत्या घरी असताना त्यांची पत्नी गौरी कांचन, सासरे अशोक तिकोने, तसेच राजू शिनगारे हे त्यांच्या घरी आले. यावेळी सर्वांनी शिवीगाळ करत लाथाबुक्यांनी मारहाण करण्यास सुरुवात केल्याचे फिर्यादीत म्हटले आहे.
सासरे अशोक तिकोने यांनी खोऱ्याच्या लाकडी दांडक्याने उजव्या पायाच्या नडगीवर वार केला. मारहाणीनंतर संबंधित आरोपी तेथून निघून गेले. जखमी अवस्थेत किरण कांचन यांनी त्यांच्या आईला फोन करून माहिती दिली. त्यानंतर त्यांना रुग्णवाहिकेद्वारे उरुळी कांचन येथील एका खासगी रुग्णालयात उपचारासाठी दाखल करण्यात आले. एक्स-रे तपासणीत उजव्या पायाला फ्रॅक्चर झाल्याचे डॉक्टरांनी सांगितले.
दरम्यान, वरील तिघांवर भारतीय न्याय संहिता (BNS) कलम 115(2), 118(1) व 352 अन्वये कारवाई करण्यात आली आहे. तपास पोलीस हवालदार सलीम शेख करीत आहेत.
