पुणे : लोहगड किल्ल्यावरून धक्का देऊन केतन अग्रवाल यांची हत्या केल्याच्या प्रकरणाचा तपास पोलिसांनी सखोल पद्धतीने केल्याची माहिती समोर आली आहे. १८ जून रोजी घडलेल्या या घटनेनंतर सुरुवातीला फोटो काढताना पाय घसरून केतन यांचा मृत्यू झाल्याचा बनाव करण्यात आल्याचा पोलिसांचा दावा आहे. मात्र, कुटुंबीयांनी संशय व्यक्त केल्यानंतर पोलिसांनी तपासाची दिशा बदलली. त्यानंतर होणारी पत्नी सिया गोयल आणि तिचा बॉयफ्रेंड चेतन चौधरी यांना अटक करण्यात आली.
पुणे ग्रामीणचे पोलिस अधीक्षक संदीपसिंग गिल यांच्या मार्गदर्शनाखाली या प्रकरणाच्या तपासासाठी विशेष तपास पथकाची (SIT) स्थापना करण्यात आली. उपअधीक्षक गजानन टोम्पे आणि सहायक निरीक्षक मनोज पवार यांच्या नेतृत्वाखाली १८ जणांच्या पथकाने सुमारे तीन महिने तपास केला. तपासाच्या शेवटच्या टप्प्यात पथकाने तब्बल आठ दिवस लोणावळ्यात तळ ठोकून कागदपत्रे आणि पुराव्यांची जुळवाजुळव केली.
सियावर संशय निर्माण झाल्यानंतर पोलिसांनी तिच्या प्री-वेडिंग शूटसह संशयितांच्या हालचालींची माहिती तपासली. मोबाईल लोकेशन, कॉल डिटेल्स आणि परिसरातील सीसीटीव्ही फुटेजचीही पडताळणी करण्यात आली. या तांत्रिक तपासातून पोलिसांच्या हाती काही महत्त्वाचे पुरावे लागल्याचे सांगण्यात आले आहे.
तपासादरम्यान चेतन चौधरी याची चौकशी करण्यात आली. त्यातून रितेश हिंगे याचे नाव समोर आले. पोलिसांच्या माहितीनुसार, या प्रकरणातील नियोजनामागे रितेशची भूमिका असल्याचे तपासात समोर आले असून त्याचीही चौकशी करण्यात आली.
या प्रकरणात पोलिसांनी पाच प्रत्यक्षदर्शी साक्षीदारांचे जबाब नोंदवले आहेत. तसेच आरोपींच्या हालचाली, रेकी, सोशल मीडिया अकाउंट, हत्येपूर्वीचे कथित नियोजन आणि कटाशी संबंधित विविध बाबींचा तपशील दोषारोपपत्रात समाविष्ट करण्यात आला आहे.
पोलिस अधीक्षक संदीपसिंग गिल यांच्या माहितीनुसार, या प्रकरणात पोलिसांनी एकूण ५ हजार ५३ पानांचे दोषारोपपत्र न्यायालयात दाखल केले आहे. या विस्तृत तपासातून लोहगड प्रकरणातील घटनाक्रम आणि पोलिसांना मिळालेले पुरावे न्यायालयासमोर मांडण्यात आले आहेत.
