डॉ. अशोक बालगुडे
पुणे: महाराष्ट्र लोकसेवा आयोगाच्या (एमपीएससी) कारभारातील कथित अनियमितता, परीक्षा प्रक्रियेतील पारदर्शकता आणि आयोगाचे अध्यक्ष विवेक भिमनवार यांच्या राजीनाम्याच्या मागणीसाठी आंदोलन करणाऱ्या विद्यार्थ्यांना एस. एम. जोशी पूल परिसर रिकामा करण्याच्या सूचना पोलिसांनी दिल्या. पोलिसांच्या व्हॅनमधून वारंवार उद्घोषणा करून आंदोलन थांबविण्याचे आवाहन करण्यात आले; मात्र, मागण्या मान्य होईपर्यंत आंदोलन सुरूच ठेवण्याची भूमिका विद्यार्थ्यांनी घेतली.
एस. एम. जोशी पूल आणि पत्रकार भवन परिसरात गेल्या काही दिवसांपासून विद्यार्थ्यांचे आंदोलन सुरू आहे. आंदोलनासाठी सुधारित परवानगी नाकारण्यात आल्याचे पोलिसांनी स्पष्ट केले असून, पर्यायी ठिकाणी आंदोलन करण्यासाठी परवानगी मागितल्यास त्याचा विचार केला जाईल, असेही पोलिसांनी सांगितले.
आंदोलनामुळे वाहतूक कोंडी तसेच नागरिकांच्या दैनंदिन हालचालींवर परिणाम होत असल्याचे पोलिसांचे म्हणणे आहे. त्यामुळे परिसर रिकामा करण्याच्या सूचना देण्यात आल्या. दुसरीकडे, आपल्या परीक्षा, भरती आणि भवितव्याशी संबंधित प्रश्नांकडे शासनाचे लक्ष वेधण्यासाठी आंदोलन सुरू ठेवण्याचा निर्धार विद्यार्थ्यांनी व्यक्त केला.
एमपीएससीच्या परीक्षा प्रक्रियेतील कथित गैरप्रकार, पेपरफुटीचे आरोप, रखडलेली भरती आणि आयोगाच्या कार्यपद्धतीबाबत विद्यार्थ्यांमध्ये नाराजी आहे. आंदोलनाला आठवा दिवस असून, पुण्यातील विविध ठिकाणीही विद्यार्थ्यांकडून निदर्शने करण्यात येत आहेत.
पोलिसांच्या सूचनांनंतरही आंदोलनस्थळ न सोडण्याची भूमिका विद्यार्थ्यांनी घेतल्याने प्रशासन आणि आंदोलकांमधील तणाव कायम आहे. आंदोलनाला कायदेशीर चौकट आणि विद्यार्थ्यांच्या मागण्यांना उत्तर या दोन्हींचा समतोल साधण्याचे आव्हान प्रशासनासमोर आहे.
