Pimpri Cyber Fraud: पुणे : पुणे परिसरात सायबर फसवणुकीचे प्रकार सातत्याने वाढत असून नागरिकांच्या सुरक्षिततेचा प्रश्न गंभीर बनत चालला आहे. अधिक नफा,नोकरी, बक्षीस किंवा तांत्रिक कारणे सांगून लोकांची आर्थिक फसवणूक (Online Fraud Case) केली जात असल्याचे अनेक प्रकार समोर येत आहेत. त्यामुळे अनेक जण सुरक्षिततेसाठी बँक अॅप्स आणि ऑनलाइन व्यवहारांचे पासवर्ड वेळोवेळी बदलत असतात. मात्र, याच प्रक्रियेचा गैरफायदा घेत फसवणूक केल्याचा धक्कादायक प्रकार पिंपरी-चिंचवड परिसरात उघडकीस आला आहे.
देहूगाव येथील अभिलाषा पार्क परिसरात राहणाऱ्या एका तरुणाची पासवर्ड अपडेट करण्याच्या बहाण्याने 6 लाख 9 हजार रुपयांची ऑनलाइन फसवणूक करण्यात आली आहे. ही घटना 7 डिसेंबर 2025 रोजी घडली असून या प्रकरणी देहूरोड पोलीस ठाण्यात तक्रार दाखल करण्यात आली आहे. पोलिसांकडून मिळालेल्या माहितीनुसार, श्रीराम रावसाहेब गीते (वय 32) असे फसवणूक झालेल्या तरुणाचे नाव आहे. ते सध्या देहूगाव येथे राहत असून त्यांचे मूळ गाव अहिल्यानगर जिल्ह्यातील पाथर्डी तालुक्यात आहे.
फिर्यादी त्यांच्या मोबाइलवर बँक ऑफ महाराष्ट्रचे महा मोबाईल प्लस अॅप वापरत असताना पासवर्ड अपडेट करण्याची सूचना आली. ही सूचना अधिकृत असल्याचा समज करून त्यांनी नवीन पासवर्ड टाकला. त्यानंतर अचानक अॅप लॉगआऊट झाले. काही वेळातच त्यांच्या मोबाइलवर बँक व्यवहारांबाबतचे अनेक मेसेज येऊ लागले.
खात्याची तपासणी केल्यानंतर त्यांना धक्का बसला. त्यांच्या खात्यातून 4 लाख 85 हजार रुपये, 50 हजार रुपये आणि 39 हजार रुपये अशा वेगवेगळ्या रकमा इतर अनोळखी खात्यांमध्ये वर्ग करण्यात आल्या होत्या. याशिवाय एटीएम स्वॅप पद्धतीने 35 हजार रुपये काढण्यात आल्याचेही समोर आले आहे. ही रक्कम कॅनरा बँक आणि एनएसडीएल पेमेंट बँकेच्या विविध खात्यांमध्ये गेली असल्याची माहिती आहे.
या प्रकरणी पोलिसांनी सायबर फसवणुकीचा गुन्हा दाखल करून तपास सुरू केला आहे. नागरिकांनी कोणतीही संशयास्पद लिंक, कॉल किंवा अॅपवरील सूचना आल्यास तात्काळ खात्री करूनच पुढील कारवाई करावी, असे आवाहन पोलिसांकडून करण्यात येत आहे.
