वानवडी, (पुणे) : इन्स्टाग्राम या सोशल मिडीयावर महिलेचे न्यूड फोटो तयार करुन ते व्हायरल करण्याची धमकी देवून खंडणी मागणाऱ्या गुन्हेगाराला वानवडी पोलीसांनी जेरबंद केले आहे.
रघुवर बलराम चौधरी (वय- 19, शिक्षण व पार्ट-टाइम नोकरी, रा. हडपसर, पुणे, मूळ राहणार दरभंगा, बिहार) असे अटक करण्यात आलेल्या आरोपीचे नाव आहे.
पोलिसांनी दिलेल्या माहितीनुसार, रघुवर चौधरी याने पिडीत महिलेचे फोटो व नाव वापरुन इन्स्टाग्राम आयडी तयार केला होता. आरोपी चौधरी याने आयडीवरील फोटो डिलीट करण्यासाठी 2 हजार रुपये खंडणी मागितली होती. तसेच पैसे न दिल्यास न्यूड मॉर्फिंग केलेले फोटो व्हायरल करण्याची धमकीही दिली होती. या प्रकरणी वानवडी पोलीस ठाण्यात गुन्हा रजिस्टर क्रमांक 104/2025 नुसार भारतीय न्याय संहिता 2023 च्या कलम 77, 78, 79, 308, (2) तसेच आय. टी. अॅक्टच्या 66 (सी) आणि 67अंतर्गत गुन्हा दाखल करण्यात आला होता.
वानवडी पोलीस ठाण्याच्या सायबर पथकाने सोशल मीडियाच्या माध्यमातून माहिती मिळवून आरोपीचा शोध घेतला. तपासात आरोपी रघुवर चौधरी असल्याचे निष्पन्न झाले. पोलिसांनी तत्काळ कारवाई करत त्याला गुरुवारी (ता. 13) रोजी अटक केली. आरोपीकडे चौकशी केली असता, त्याने गुन्ह्याची कबुली दिली. तसेच त्याच्या मोबाईलची तपासणी करताना आणखी महत्त्वपूर्ण पुरावे पोलिसांच्या हाती लागले. आरोपीला 17 मार्च 2025 पर्यंत पोलीस कोठडी मंजूर करण्यात आली आहे. पुढील तपास पोलीस निरीक्षक (गुन्हे) गोविंद जाधव करत आहेत.
सदरची कारवाई परिमंडल 5 चे पोलीस उप-आयुक्त डॉ. राजकुमार शिंदे, सहायक पोलीस आयुक्त धन्यकुमार गोडसे, वानवडी पोलीस ठाण्याचे वरिष्ठ पोलीस निरीक्षक सत्यजित आदमाणे यांच्या मार्गदर्शनाखाली पोलीस निरीक्षक (गुन्हे) गोविंद जाधव, पोलीस उप-निरीक्षक आशिष जाधव व पोलीस अंमलदार अमोल पिलाणे, अतुल गायकवाड, सर्फराज देशमुख, सोमनाथ कांबळे व सुजाता फुलसुंदर या पथकाने केली आहे.
