पुणे: सिंहगड रस्त्यावरील माणिकबाग परिसरातील खाऊ गल्लीत अन्न व औषध प्रशासनाने (FDA) विशेष तपासणी मोहीम राबवत अनियमितता उघडकीस आणल्या आहेत. मंगळवारी (१७ नोव्हेंबर) करण्यात आलेल्या कारवाईत एकूण नऊ खाद्य आस्थापनांची तपासणी करण्यात आली. यापैकी सहा आस्थापनांकडे वैध अन्न सुरक्षा परवाना किंवा नोंदणी नसल्याचे आढळले. त्यामुळे संबंधित आस्थापनांना तातडीने व्यवसाय बंद करण्याच्या ‘स्टॉप बिझनेस’ नोटिसा बजावण्यात आल्या आहेत.

नागरिकांना सुरक्षित आणि स्वच्छ खाद्यपदार्थ मिळावेत, या उद्देशाने ‘सेफ फूड, सेफ महाराष्ट्र’ मोहिमेतील ‘ईट राईट स्ट्रीट’ उपक्रमांतर्गत ही कारवाई करण्यात आली. FDA च्या पुणे विभागातील झोन क्रमांक ७ च्या पथकाने माणिकबाग येथील गोयल गंगा इमारतीसमोरील खाद्य आस्थापनांची पाहणी केली.
या तपासणीत परवाना आणि नोंदणीची कागदपत्रे, खाद्यपदार्थ तयार करण्याची जागा, पदार्थांची साठवणूक, कर्मचाऱ्यांची स्वच्छता आणि कचरा व्यवस्थापनाची स्थिती तपासण्यात आली.

प्रशासनाने दिलेल्या माहितीनुसार, मे. नीलंका राईस सेंटर, मे. पुणेरी अंडा भुर्जी सेंटर, मे. वृंदावन डाळ खिचडी, मे. अमृत वडेवाले, मे. ओम साई राम टी सेंटर कॉर्नर आणि मे. नॅचरल फ्रेश ज्यूस सेंटर या सहा आस्थापनांना नोटिसा बजावण्यात आल्या आहेत.
संबंधित सहाही आस्थापनांकडे FSSAI चा वैध परवाना किंवा नोंदणी नसल्याचे तपासणी पथकाने नमूद केले. याशिवाय काही ठिकाणी तयार खाद्यपदार्थ उघड्यावर ठेवण्यात आल्याचे आढळले. त्यामुळे धूळ आणि कीटकांमुळे अन्न दूषित होण्याचा धोका असल्याचे प्रशासनाने स्पष्ट केले.
काही कर्मचाऱ्यांचे अॅप्रन आणि हातमोजे अस्वच्छ असल्याचेही निदर्शनास आले. तसेच कर्मचाऱ्यांच्या वैद्यकीय तंदुरुस्तीच्या नोंदी तपासणीदरम्यान उपलब्ध नव्हत्या. अन्न सुरक्षा नियमांचे पालन आणि स्वच्छतेबाबतच्या त्रुटींमुळे ही कारवाई करण्यात आली आहे.







