पुणे : बालेवाडी परिसरात दांडिया कार्यक्रम पाहण्यासाठी बहिणीसोबत आलेल्या २० वर्षीय तरुणाला जुन्या वादातून मारहाण करून डोक्यात दगड घालून जखमी केल्याची घटना घडली आहे. ही घटना १७ ऑक्टोबर रोजी रात्री साई चौक परिसरात घडली. याप्रकरणी बाणेर पोलीस ठाण्यात किरण सोनवणे याच्यासह तिघांविरुद्ध गुन्हा दाखल करण्यात आला आहे.
याबाबत सुमीत राजू राठोड (वय २०, रा. पाटीलनगर, बालेवाडी) याने पोलिसांत फिर्याद दिली आहे. पोलिसांनी दिलेल्या माहितीनुसार, सुमीत हा १७ ऑक्टोबर रोजी रात्री आपल्या बहिणीसोबत बालेवाडीतील साई चौक येथे आयोजित दांडिया कार्यक्रम पाहण्यासाठी गेला होता. त्यावेळी जुन्या वादाच्या कारणावरून आरोपींनी त्याच्याशी वाद घातला. त्यानंतर त्याला मारहाण करण्यात आली. या हल्ल्यात आरोपींनी सुमीतच्या डोक्यात दगड घातल्याने तो जखमी झाला. या घटनेमुळे परिसरात खळबळ उडाली आहे.
घटनेनंतर सुमीत राठोड याने बाणेर पोलीस ठाण्यात तक्रार दाखल केली. त्यानुसार पोलिसांनी किरण सोनवणे याच्यासह अन्य दोघांविरुद्ध गुन्हा नोंदवला आहे. या प्रकरणाचा पुढील तपास पोलीस हवालदार सकट करीत आहेत. जुन्या वादातून झालेल्या या हल्ल्यामागील नेमके कारण आणि घटनेतील इतर तपशीलांचा पोलीस तपास करीत आहेत.
