पुणे : ड्रोन आणि आयएफडी पॅनेल निर्मिती व्यवसायात मोठा नफा मिळवून देण्याचे आमिष दाखवत निवृत्त सुभेदार आणि त्यांच्या नातेवाईकांची तब्बल 1 कोटी 70 लाख रुपयांची फसवणूक केल्याचा प्रकार उघडकीस आला आहे. या प्रकरणी कोल्हापूरमधील कंपनी संचालकांसह पुण्यातील एका सीए दाम्पत्याविरोधात गुन्हा दाखल करण्यात आला आहे.
सुभेदार किशोर देवसिंग बरंडवाल (वय 54, रा. मुकुंदवाडी) यांनी दिलेल्या तक्रारीवरून मुकुंदवाडी पोलीस ठाण्यात गुन्हा नोंदविण्यात आला आहे. आरोपींमध्ये जलील नूरुद्दीन किरणगी, सचिन सिताराम झेपले, वैभव खामकर, शिल्पा सुशांत फडणवीस आणि सुशांत शरदचंद्र फडणवीस यांचा समावेश आहे.
पोलिसांनी दिलेल्या माहितीनुसार, 2021 मध्ये बरंडवाल यांची ओळख मित्राच्या माध्यमातून कोल्हापूर येथील एका कंपनीच्या संचालकांशी झाली होती. कंपनीत गुंतवणूक केल्यास दरमहा 15 टक्के परतावा मिळेल, असे आश्वासन आरोपींनी दिले होते. तसेच ड्रोन आणि आयएफडी पॅनेल निर्मिती क्षेत्रात कंपनी मोठ्या प्रमाणात काम करत असल्याचे सांगून गुंतवणुकीसाठी प्रोत्साहित करण्यात आले.
या आश्वासनांवर विश्वास ठेवून बरंडवाल आणि त्यांचे नातेवाईक पवनकुमार पवार यांनी सुरुवातीला 29 लाख रुपये गुंतवले. त्यानंतर फेब्रुवारी ते ऑगस्ट 2022 या कालावधीत विविध टप्प्यांमध्ये एकूण 1 कोटी 70 लाख रुपये आरोपींच्या बँक खात्यांमध्ये जमा करण्यात आले.
यानंतर गुंतवणूकदारांना नव्या कंपनीचे शेअर्स देण्याचे आश्वासन देण्यात आले. या प्रक्रियेत पुण्यातील सीए दाम्पत्यानेही विश्वास संपादन केल्याचा आरोप तक्रारीत करण्यात आला आहे.
मात्र काही काळानंतर गुंतवणुकीवरील परतावा मिळणे बंद झाले. पैसे परत मागितल्यानंतर आरोपींनी 2 कोटी 37 लाखांहून अधिक रक्कम परतावा आणि बोनस म्हणून देण्याचे लेखी आश्वासन दिले. तसेच 18 लाख आणि 20 लाख रुपयांचे असे एकूण 38 लाख रुपयांचे धनादेश दिले. मात्र हे दोन्ही धनादेश बँकेत सादर केल्यानंतर बाऊन्स झाल्याचे समोर आले.
फसवणूक झाल्याचे लक्षात आल्यानंतर बरंडवाल यांनी पोलिसांत धाव घेतली. त्यानुसार पाच जणांविरोधात गुन्हा दाखल करण्यात आला असून पोलीस उपनिरीक्षक प्रशांत पासलकर पुढील तपास करत आहेत.
