पुणे: पुणे जिल्ह्यातील नगरपरिषद (Local Bodies Election) आणि नगरपंचायत निवडणुका (Pune Election) काही दिवसांवर आल्या असून विविध पक्षांचे उमेदवार जोरदार प्रचार करत आहेत. मतदान आणि मतमोजणीच्या दिवशी कोणताही अनुशासनभंग होऊ नये आणि शांतता राखली जावी, यासाठी जिल्हा दंडाधिकारी जितेंद्र डुडी यांनी महत्त्वाचे प्रतिबंधात्मक आदेश जारी केले आहेत. (Pune News)
या आदेशानुसार, सर्व मतदान केंद्रे आणि मतमोजणी स्थळांपासून 100 मीटर परिसर ‘प्रतिबंधित क्षेत्र’ म्हणून घोषित करण्यात आला आहे. या क्षेत्रात मतदारांशिवाय इतर कोणालाही प्रवेश देण्यात येणार नाही. मतदानासाठी 2 डिसेंबर रोजी सकाळी 7.30 वाजता मतदान सुरू झाल्यापासून मतदान संपेपर्यंत हा बंदोबस्त लागू राहील. तसेच मतमोजणीसाठी 3 डिसेंबरला सकाळी 6 वाजल्यापासून मतमोजणी पूर्ण होईपर्यंत संपूर्ण परिसरात कठोर निर्बंध लागू असतील.
प्रतिबंधित क्षेत्रात कोणतेही दुकान उघडणे, फेरीविक्री करणे, तात्पुरती मंडपे लावणे, स्टॉल लावणे यावर पूर्ण बंदी असेल. याशिवाय मोबाईल फोन, कॉर्डलेस फोन, वायरलेस सेट, ध्वनिक्षेपक किंवा इतर इलेक्ट्रॉनिक उपकरणांचा वापर करणेही प्रतिबंधित केले आहे. या आदेशाने मतदान केंद्राच्या परिसरात होणारी कोणतीही गोंधळाची किंवा अनुचित हालचाल रोखण्याचा प्रयत्न आहे.
निवडणूक कामाशी संबंधित अधिकारी, कर्मचारी तसेच त्यांच्या वाहनांना या बंदीपासून सूट देण्यात आली आहे. मात्र इतर कुणीही नियमांचे उल्लंघन केल्यास त्यांच्यावर लोकप्रतिनिधित्व अधिनियम आणि भारतीय न्याय संहिता 2023 च्या कलम 223 नुसार कारवाई केली जाईल, असे आदेशात स्पष्टपणे नमूद करण्यात आले आहे. या निर्णयामुळे मतदान केंद्रांवर आणि मतमोजणी स्थळांवर सुरक्षितता आणि शिस्त राखण्यास मदत होणार असून प्रशासनाने सर्व नागरिकांनी नियमनांचे पालन करण्याचे आवाहन केले आहे.
