पुणे : सुरक्षित शालेय विद्यार्थी वाहतुकीसाठी पुणे प्रादेशिक परिवहन विभागाने राबविलेल्या विशेष मोहिमेला चांगला प्रतिसाद मिळाला आहे. शहरातील सुमारे ९० टक्के शालेय बस आणि व्हॅन यांनी वैध ‘फिटनेस’ प्रमाणपत्र घेतले असले, तरी अद्याप ८१२ वाहनांकडे हे प्रमाणपत्र नसल्याचे आढळून आले आहे. अशा वाहनांवर आता आरटीओने विशेष तपासणी मोहीम सुरू केली आहे.
नवीन शैक्षणिक वर्ष सुरू झाल्यानंतर शालेय विद्यार्थ्यांच्या सुरक्षित वाहतुकीसाठी आरटीओने सर्व स्कूल बस आणि व्हॅन चालकांना ‘फिटनेस’ प्रमाणपत्र घेण्याचे आवाहन केले होते. यासाठी विशेष मोहीम राबविण्यात आली असून शनिवार आणि रविवारीही तपासणीची सुविधा उपलब्ध करून देण्यात आली होती.
आरटीओने दिलेल्या माहितीनुसार, पुण्यात विद्यार्थ्यांची वाहतूक करणाऱ्या एकूण ७,४५२ वाहनांपैकी ७,३३९ या स्कूल बस आहेत. त्यापैकी ६,५४६ बसांनी वैध ‘फिटनेस’ प्रमाणपत्र घेतले असून ७९३ बसांकडे अद्याप हे प्रमाणपत्र नाही. तसेच ११३ शालेय व्हॅनपैकी ९४ व्हॅनकडे ‘फिटनेस’ प्रमाणपत्र आहे, तर १९ व्हॅन अद्याप प्रमाणपत्राविना सुरू असल्याचे आढळून आले आहे.
स्कूल बस नियमावलीनुसार विद्यार्थ्यांची व्यावसायिक स्वरूपात वाहतूक करणाऱ्या प्रत्येक वाहनाची दरवर्षी ‘फिटनेस’ तपासणी करणे बंधनकारक आहे. या तपासणीत वाहनाची तांत्रिक स्थिती, सुरक्षितता आणि इतर आवश्यक बाबींची पडताळणी केली जाते.
आरटीओने वैध ‘फिटनेस’ प्रमाणपत्र नसलेल्या शालेय वाहनांवर कठोर कारवाईचा इशारा दिला आहे. तसेच पालकांनी आपल्या मुलांची वाहतूक करणाऱ्या बस किंवा व्हॅनचे फिटनेस प्रमाणपत्र, परवाना आणि सुरक्षा नियमांचे पालन होत आहे का, याची खात्री करून घ्यावी, असे आवाहन करण्यात आले आहे. याशिवाय खासगी वाहनांमधून बेकायदेशीरपणे विद्यार्थी वाहतूक करणाऱ्यांविरोधातही कारवाई केली जाणार असल्याचे आरटीओने स्पष्ट केले आहे.
