पुणे : येरवडा कारागृहात गांजा तस्करीचा प्रयत्न कारागृह प्रशासनाने हाणून पाडला आहे. न्यायालयातून परत आणण्यात आलेल्या एका कैद्याने गांजा गुदद्वारातून कारागृहात आणण्याचा प्रयत्न केला. मात्र, गांजावर गुंडाळलेल्या फॉईल पेपरमुळे मेटल डिटेक्टरचा अलार्म वाजल्याने हा प्रकार उघडकीस आला. याप्रकरणी कारागृह पोलीस अंमलदार समाधान बाबुराव हत्तींकर यांनी येरवडा पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, निहालसिंग टाक याला न्यायालयीन सुनावणीसाठी येरवडा कारागृहातून बाहेर नेण्यात आले होते. १८ जुलै रोजी दुपारी साडेबारा वाजता त्याला पुन्हा कारागृहात आणण्यात आले. कारागृहात प्रवेश करण्यापूर्वी त्याची नियमित अंगझडती घेण्यात आली. मात्र, अंगझडतीत कोणतीही संशयास्पद वस्तू आढळली नाही.
त्यानंतर तो मेटल डिटेक्टरमधून जात असताना मशीनने वारंवार सिग्नल दिला. अंगझडतीत काहीही न सापडल्याने कारागृह पोलिसांनी त्याची सखोल चौकशी केली. विश्वासात घेतल्यानंतर आरोपीने आपल्या गुदद्वारात गांजा लपवून आणल्याची कबुली दिली.
यानंतर पोलिसांनी त्याच्याकडून तो गांजा बाहेर काढून घेतला. गांजाच्या पुडीवर गुंडाळलेल्या फॉईल पेपरमुळे मेटल डिटेक्टरने सिग्नल दिल्याने हा प्रकार उघडकीस आल्याचे तपासात समोर आले आहे. याप्रकरणी येरवडा पोलीस ठाण्यात गुन्हा दाखल करण्यात आला असून पुढील तपास सुरू आहे.
