बारामती : बारामती शहरातील अरिहंत मिनी मार्केटमध्ये कृत्रिम दूध तयार करण्यासाठी वापरल्या जाणाऱ्या साहित्याचा संशयित साठा आढळून आल्याने अन्न व औषध प्रशासनाने मोठी कारवाई केली आहे. या प्रकरणी बारामती शहर पोलिसांनी आठ जणांविरुद्ध अन्न सुरक्षा आणि मानके अधिनियमासह विविध कलमांन्वये गुन्हा दाखल केला आहे. या कारवाईमुळे कृत्रिम दूधनिर्मिती आणि पुरवठा करणाऱ्या संभाव्य रॅकेटचा पर्दाफाश होण्याची शक्यता व्यक्त केली जात आहे.
याप्रकरणी अन्न सुरक्षा अधिकारी संदीप दिगंबरराव शिंदे यांनी फिर्याद दिली आहे. ही कारवाई १६ जुलै रोजी करण्यात आली.
पोलिसांनी दिलेल्या माहितीनुसार, राज्यातील विविध भागांत कृत्रिम दूध तयार करून त्याचा पुरवठा होत असल्याची गोपनीय माहिती अन्न व औषध प्रशासनाला मिळाली होती. त्यानुसार बारामतीतील अरिहंत मिनी मार्केटमधील आस्थापनावर छापा टाकण्यात आला.
तपासणीदरम्यान २५ किलोचे व्हे पावडरचे एक पोते, स्किम मिल्क पावडरची दोन पोती आणि व्हे परमिट पावडरची दोन पोती असा संशयित साठा आढळून आला. संबंधित साहित्याच्या खरेदी-विक्रीची कागदपत्रे मागविल्यानंतर आस्थापनाचे मालक संदीप अशोकलाल बागमार यांना ती सादर करता आली नाहीत. चौकशीत हा माल विविध दूध विक्रेते, दूध संकलन केंद्रे आणि शीतकरण केंद्रांना पुरवण्यासाठी साठवून ठेवल्याची माहिती समोर आली.
या प्रकरणी संदीप अशोकलाल बागमार, नीलेश मोरे, भोरी मॅडम, दत्तात्रय बावधे, दीपक पिसाळ, प्रवीण दातीर, सूरज सोलनकर आणि हेमंत टेके यांच्याविरुद्ध गुन्हा दाखल करण्यात आला असून पुढील तपास सुरू आहे.
