पुणे: उत्तराखंडमधील प्रसिद्ध पर्यटनस्थळ मसुरी येथे हनीमूनसाठी गेलेल्या 27 वर्षीय सॉफ्टवेअर इंजिनीअर महिलेचा संशयास्पद मृत्यू झाल्याची घटना समोर आली आहे. या घटनेमुळे परिसरात खळबळ उडाली असून मृत्यूचे नेमके कारण अद्याप स्पष्ट झालेले नाही.
मृत महिलेची ओळख पी. राधा गायत्री अशी झाली आहे. त्या गुरुग्राममधील एका आयटी कंपनीत कार्यरत होत्या आणि दिल्लीतील किडवाई नगर ईस्ट परिसरात राहत होत्या. त्यांचे पती सौम्य श्रीचरण हे पुण्यातील आयटी क्षेत्रात कार्यरत असल्याची माहिती पोलिसांनी दिली आहे.
मिळालेल्या माहितीनुसार, राधा गायत्री आणि त्यांचे पती 14 जूनच्या रात्री मसुरीतील टिपरीधर भागातील कियाना होमस्टेमध्ये दाखल झाले. रात्री सुमारे 11.30 वाजण्याच्या सुमारास त्यांनी ‘ब्लिस’ नावाच्या खोलीत प्रवेश घेतला. पतीने पोलिसांना दिलेल्या माहितीनुसार, दोघांनी रात्री मद्यसेवन केले होते आणि पहाटे सुमारे 3.30 वाजता ते झोपले.
सकाळी उठल्यानंतर पतीला पत्नी खोलीतील फरशीवर बेशुद्ध अवस्थेत पडलेली दिसली. तिच्या नाकातून रक्त येत असल्याचेही त्यांना आढळून आले. यानंतर तातडीने पोलिस आणि आपत्कालीन वैद्यकीय सेवांना माहिती देण्यात आली.
घटनास्थळी पोहोचलेल्या वैद्यकीय पथकाने तपासणी केल्यानंतर महिलेला मृत घोषित केले. प्राथमिक तपासात पोलिसांना खोलीतील बेडशीटवर रक्ताचे डाग आढळले. तसेच खोलीतून दोन रिकाम्या मद्याच्या बाटल्या आणि काही खाद्यपदार्थ जप्त करण्यात आले आहेत. त्यामुळे मृत्यूभोवतीचे गूढ आणखी वाढले आहे.
राधा गायत्री आणि सौम्य श्रीचरण यांचा विवाह 8 नोव्हेंबर 2025 रोजी झाला होता. दोघेही मूळचे आंध्र प्रदेशातील विशाखापट्टणम येथील रहिवासी आहेत.
महिलेचा मृतदेह शवविच्छेदनासाठी डेहराडून येथील कोरोनेशन रुग्णालयात पाठविण्यात आला आहे. पोलिसांनी डॉक्टरांच्या पथकाकडून आणि व्हिडिओ रेकॉर्डिंगच्या देखरेखीखाली शवविच्छेदन करण्याची विनंती केली आहे. अहवाल प्राप्त झाल्यानंतर मृत्यूचे नेमके कारण स्पष्ट होणार असून पुढील तपास सुरू आहे.
