पुणे: बहिण-भावाच्या नात्याचा उत्सव असलेल्या रक्षाबंधनाच्या काही तास आधी पुण्यातील वाकड परिसरातून मन हेलावून टाकणारी घटना समोर आली आहे. शिल्पा सचिन गवारे (वय ३२) या विवाहितेचा संशयास्पद मृत्यू झाला. सासरच्या मंडळींकडून होत असलेल्या शारीरिक आणि मानसिक छळाला कंटाळून हा प्रकार घडल्याचा आरोप तिच्या माहेरच्या कुटुंबीयांनी केला आहे. लेकीचा सणाच्या तोंडावरच मृत्यू झाल्याने कुटुंबावर दुःखाचा डोंगर कोसळला आहे.
शिल्पा यांचा विवाह वाकड परिसरातील गवारे कुटुंबात झाला होता. लग्नानंतर काही काळाने त्यांच्या संसारात वाद सुरू झाल्याचे माहेरच्यांनी सांगितले. पती सचिन गवारे, सासरे उत्तम गवारे आणि सासू संजीवनी गवारे यांच्याकडून शिल्पा यांचा कथितरित्या शारीरिक आणि मानसिक छळ केला जात होता. माहेरच्या मालमत्तेतील हिस्सा घेऊन येण्यासाठी तिच्यावर दबाव टाकला जात होता. पैसे आणि संपत्तीच्या मागणीवरून तिला शिवीगाळ आणि मारहाण केली जात असल्याचा गंभीर आरोप नातेवाईकांनी केला आहे.
शिल्पा यांच्या भावानेही सासरच्या मंडळींवर गंभीर आरोप केले आहेत. त्याच्या म्हणण्यानुसार, सचिन हे दारूच्या नशेत शिल्पा यांना मारहाण करत होते. काही दिवसांपूर्वी त्यांच्या डोक्यात इस्त्री मारल्याचे, तसेच यापूर्वीही इस्त्रीचे चटके दिल्याचे भावाने सांगितले. आज ना उद्या परिस्थिती सुधारेल, या आशेने कुटुंबीय शांत राहिल्याचेही त्याने सांगितले.
शिल्पा अत्यंत संयमी स्वभावाच्या होत्या. त्यामुळे त्या स्वतःहून असे टोकाचे पाऊल उचलतील, यावर विश्वास बसत नसल्याचे भावाने सांगितले. मालमत्तेच्या वादाबाबत शिल्पा यांनी भावाशी बोलताना, “भाऊ, तू जिथे सांगशील तिथे मी सही देते. मला सासरच्यांचं ऐकायचं नाही. मला शेवटपर्यंत आपलं भाऊ-बहिणीचं नातं जपायचंय,” असे म्हटल्याचेही त्याने सांगितले.
रक्षाबंधनाच्या आदल्या दिवशीच बहिणीचा मृत्यू झाल्याने तिच्या भावासह माहेरच्या कुटुंबीयांचा आक्रोश पाहायला मिळाला. या प्रकरणाची सखोल चौकशी करून दोषींवर कठोर कारवाई करावी, अशी मागणी नातेवाईकांनी केली आहे. पोलिसांकडून प्रकरणाचा पुढील तपास सुरू असून, शिल्पा यांच्या मृत्यूमागील नेमके कारण तपासानंतर स्पष्ट होणार आहे.
