लोणी काळभोर, ता. 17 : प्रतिबंधक कारवाईनंतरही गुन्हेगारी कारवाया सुरू ठेवून परिसरात दहशत निर्माण करणाऱ्या सराईत गुन्हेगारावर लोणी काळभोर पोलिसांनी पुन्हा एम.पी.डी.ए. कायद्यान्वये कारवाई केली आहे. अशी माहिती लोणी काळभोर पोलीस ठाण्याचे वरिष्ठ पोलीस निरीक्षक प्रदीप पवार यांनी दिली आहे.
राज रविंद्र पवार (वय २८, रा. गुजरवस्ती, कवडीपाट टोलनाका, ता. हवेली, जि. पुणे) याला एक वर्षासाठी स्थानबद्ध करण्यात आले असून, त्याची रवानगी अमरावती कारागृहात करण्यात आली आहे.
पोलिसांनी दिलेल्या माहितीनुसार, राज पवार हा लोणी काळभोर व हडपसर पोलीस ठाण्यांच्या अभिलेखावरील सराईत गुन्हेगार असून त्याच्याविरुद्ध यापूर्वी एकूण १४ गंभीर गुन्हे दाखल आहेत. यापूर्वीही पोलिसांनी त्याच्यावर प्रतिबंधात्मक कारवाई केली होती. मात्र, या कारवाईला न जुमानता त्याने पुन्हा गुन्हेगारी कारवाया सुरूच ठेवल्या.
पवार याच्यावर यापूर्वी ३ सप्टेंबर २०२४ रोजी एम.पी.डी.ए. कायद्यान्वये कारवाई करून त्याची कोल्हापूर येथील कारागृहात रवानगी करण्यात आली होती. कारागृहातून बाहेर आल्यानंतरही त्याने लोणी काळभोर परिसरात पुन्हा गंभीर स्वरूपाचे गुन्हे केल्याचे पोलिसांनी नमूद केले आहे.राज पवार याच्यावर खुनाचा प्रयत्न, धोकादायक शस्त्राने दुखापत करणे, इतरांच्या जीवितास व वैयक्तिक सुरक्षिततेस धोका निर्माण करणारी कृत्ये, गंभीर धमकी, मृत्यूची भीती दाखवून खंडणी तसेच बेकायदेशीर शस्त्र बाळगणे यांसारखे गंभीर गुन्हे दाखल असल्याचे पोलिसांनी सांगितले.
सततच्या गुन्हेगारी कृत्यांमुळे पवार हा सार्वजनिक सुव्यवस्थेसाठी धोकादायक असल्याचे निष्पन्न झाल्यानंतर लोणी काळभोर पोलिसांनी त्याच्याविरुद्ध पुन्हा एम.पी.डी.ए. कायद्यान्वये प्रस्ताव सादर केला. त्यानुसार त्याला एक वर्षासाठी स्थानबद्ध करण्यात आले आहे.
दरम्यान, पुणे शहरातील कायदा व सुव्यवस्था अबाधित ठेवण्यासाठी सराईत गुन्हेगारांवर कठोर व परिणामकारक कारवाई करण्याचे निर्देश पोलीस आयुक्त अमितेशकुमार यांनी दिले आहेत. त्यानुसार ही कारवाई करण्यात आली.
ही कारवाई पोलीस आयुक्त अमितेशकुमार, पोलीस सहआयुक्त संजय दराडे, अपर पोलीस आयुक्त मनोज पाटील, पोलीस उपआयुक्त जीवन बेनिवाल आणि सहायक पोलीस आयुक्त अनुराधा उदमले यांच्या मार्गदर्शनाखाली लोणी काळभोर पोलीस ठाण्याचे वरिष्ठ पोलीस निरीक्षक प्रदीप पवार, पोलीस निरीक्षक (गुन्हे) नंदकुमार कोळी, सहायक पोलीस निरीक्षक कृष्णा बाबर तसेच पोलीस हवालदार विलास शिंदे, पोलीस अंमलदार प्रशांत नरसाळे, योगिता भोसुरे, चेतन कुंभार, अमोल जाधव आणि गणेश शिंदे यांनी केली.
