पुणे: पुण्यातील कुख्यात घायवळ टोळीचा सदस्य आणि गुंड निलेश घायवळचा भाऊ सचिन घायवळ याला अखेर पुणे पोलिसांच्या गुन्हे शाखेने राजस्थानमधून अटक केली आहे. कोथरूडमधील गोळीबार प्रकरणानंतर घायवळ टोळी पुन्हा चर्चेत आली होती. या घटनेनंतर मुख्य आरोपी निलेश घायवळ परदेशात पळून गेला होता, तर त्याचा भाऊ सचिन अनेक महिन्यांपासून फरार होता.
पोलिसांनी दिलेल्या माहितीनुसार, सचिन घायवळवर अनेक गंभीर गुन्हे दाखल आहेत. त्याच्यावर खुनाचा प्रयत्न, शस्त्र कायद्याचे उल्लंघन, खंडणी वसुली आणि मालमत्तेवर बेकायदेशीर कब्जा केल्याचे आरोप आहेत. कोथरूड परिसरातील एका नव्या इमारतीतील 10 सदनिका जबरदस्तीने ताब्यात घेतल्याप्रकरणीही त्याच्याविरोधात गुन्हा दाखल करण्यात आला होता.
याशिवाय, कर्वेनगर आणि शिवणे परिसरातील एका नामांकित शाळेला खाद्यपदार्थ आणि वाहतूक सेवा पुरवणाऱ्या खासगी कंपनीच्या महिला संचालिकेकडून खंडणी उकळल्याचा आरोपही त्याच्यावर आहे. निलेश घायवळनंतर टोळीतील प्रमुख व्यक्ती म्हणून सचिनची ओळख होती.
सचिनचा शोध घेण्यासाठी पुणे पोलिसांनी पुणे जिल्हा, अहिल्यानगर आणि मराठवाड्यात मोठी शोधमोहीम राबवली होती. काही दिवसांपूर्वी तो जामखेड परिसरात असल्याची माहिती पोलिसांना मिळाली होती. त्यानुसार सापळा रचण्यात आला होता. मात्र, स्थानिकांकडून मदत मिळाल्याने तो पोलिसांना चकवा देत पसार झाला होता.
अखेर तांत्रिक तपास आणि गुप्त माहितीच्या आधारे पोलिसांनी राजस्थानमधील सिकर जिल्ह्यातून त्याला ताब्यात घेतले. त्यानंतर त्याला पुण्यात आणण्यात आले आहे.
दरम्यान, मुख्य आरोपी निलेश घायवळ अद्याप परदेशात असल्याचे समोर आले आहे. त्याचा पासपोर्ट पोलिसांनी यापूर्वीच रद्द केला असून त्याचा व्हिसाही आपोआप रद्द झाला होता. तरीही तो नेमका कोणत्या देशात आहे, याची माहिती अद्याप मिळालेली नाही. त्याला भारतात परत आणण्यासाठी पुणे पोलीस आंतरराष्ट्रीय स्तरावर प्रयत्न करत आहेत. प्रकरणाचा पुढील तपास सुरू आहे.
