पुणे : गणेश विसर्जन मिरवणुकीदरम्यान ध्वनिक्षेपकांच्या आवाजावर नियंत्रण ठेवण्यासाठी पुणे पोलिसांनी यंदा ‘चार बेस, चार टॉप’ या नियमाची अंमलबजावणी केली होती. मात्र, विसर्जन मिरवणुकीत अनेक गणेश मंडळांकडून या नियमांचे पालन झाले नसल्याचे पोलिसांच्या तपासणीत समोर आले आहे. मिरवणुकीदरम्यान आवाजाची पातळी निर्धारित मर्यादेपेक्षा अधिक असल्याचे आढळलेल्या मंडळांवर आता कारवाईची प्रक्रिया सुरू करण्यात आली आहे.
पुणे पोलिसांनी २५ आणि २६ सप्टेंबर रोजी झालेल्या गणेश विसर्जन मिरवणुकीत सहभागी झालेल्या मंडळांच्या साऊंड सिस्टीमच्या आवाजाची तपासणी केली. दोन दिवसांत तब्बल १ हजार २२४ गणेश मंडळांच्या आवाजाची डेसिबल पातळी मोजण्यात आली. या तपासणीदरम्यान ध्वनिक्षेपकांचा आवाज निर्धारित निकषांनुसार आहे की नाही, याची नोंद पोलिसांनी केली. या नोंदीच्या आधारे नियमांचे उल्लंघन करणाऱ्या मंडळांची स्वतंत्र यादी तयार करण्यात येत आहे.
आवाजाची मर्यादा ओलांडल्याचे आढळलेल्या गणेश मंडळांना पुणे पोलिसांकडून कारणे दाखवा नोटीस बजावण्यात येणार आहे. या नोटीसमध्ये संबंधित मंडळांकडून नियमांचे उल्लंघन का झाले, याबाबत स्पष्टीकरण मागवले जाणार आहे. मंडळांकडून मिळणारे उत्तर आणि त्यांचे म्हणणे तपासल्यानंतर पुढील कारवाईबाबत निर्णय घेतला जाणार आहे.
गणेश विसर्जन मिरवणुकीत ध्वनिप्रदूषणाचा प्रश्न निर्माण होऊ नये आणि ध्वनिक्षेपकांच्या आवाजावर नियंत्रण राहावे, यासाठी पोलिसांनी ‘चार बेस, चार टॉप’चा नियम लागू केला होता. मात्र, प्रत्यक्ष मिरवणुकीत काही मंडळांकडून त्याचे उल्लंघन झाल्याचे निदर्शनास आले. त्यामुळे आता पोलिसांच्या कारवाईकडे गणेश मंडळांचे लक्ष लागले आहे.
