पुणे : नामांकित बेकरी किंवा हॉटेलमधून खाद्यपदार्थ खरेदी करताना ग्राहकांकडून स्वच्छता आणि गुणवत्तेबाबत विशेष विश्वास ठेवला जातो. मात्र, अशाच प्रसिद्ध ठिकाणच्या खाद्यपदार्थात अळी आढळल्याचा प्रकार समोर आल्याने पुण्यात खळबळ उडाली आहे. या घटनेमुळे संबंधित बेकरीच्या स्वच्छता आणि अन्नाच्या गुणवत्ता नियंत्रणावर प्रश्न उपस्थित झाले आहेत.
पुण्यातील विमाननगर परिसरातील प्रसिद्ध फिनिक्स मार्केटसिटी मॉलमध्ये पॉल बेकरीचे दुकान आहे. ग्राहकाने 24 ऑगस्ट रोजी या बेकरीमधून काही खाद्यपदार्थ खरेदी केल्याचे सांगितले आहे. हे पदार्थ घरी नेल्यानंतर ते खाण्यासाठी उघडले असता त्यामध्ये चक्क जिवंत अळी आढळल्याचा दावा त्यांनी केला आहे.
खाद्यपदार्थात अळी दिसल्यानंतर संबंधित ग्राहकाला धक्काच बसला. त्यानंतर त्यांनी या प्रकाराचा व्हिडिओ आणि खाद्यपदार्थांचे फोटो सोशल मीडियावर शेअर करत आपला अनुभव मांडला. प्रसिद्ध आणि महागड्या खाद्यपदार्थांसाठी ओळखल्या जाणाऱ्या ठिकाणी असा प्रकार घडल्याने ग्राहकांमध्येही चिंता व्यक्त होत आहे.
सामान्यतः नामांकित बेकरी किंवा हॉटेलमध्ये स्वच्छता, दर्जेदार कच्चा माल आणि अन्नाच्या गुणवत्तेची योग्य काळजी घेतली जाते, अशी ग्राहकांची अपेक्षा असते. त्यामुळे खाद्यपदार्थात अळी आढळल्याचा दावा समोर आल्यानंतर या अपेक्षांवर प्रश्नचिन्ह निर्माण झाले आहे.
दरम्यान, या प्रकरणाची अधिकृतपणे पडताळणी झालेली नसून, संबंधित ग्राहकाने केलेल्या दाव्याच्या आधारे हा प्रकार समोर आला आहे. बेकरी व्यवस्थापनाकडून या घटनेबाबत अद्याप कोणतीही अधिकृत प्रतिक्रिया देण्यात आलेली नाही. त्यामुळे नेमका प्रकार कसा घडला, खाद्यपदार्थाच्या गुणवत्तेत कोणती त्रुटी राहिली आणि याबाबत प्रशासनाकडून काही कारवाई होणार का, याकडे आता लक्ष लागले आहे.
या घटनेमुळे खाद्यपदार्थ खरेदी करताना ग्राहकांनी पॅकेजिंग, उत्पादनाची तारीख, साठवणूक आणि खाद्यपदार्थाची स्थिती तपासण्याची गरज पुन्हा अधोरेखित झाली आहे.
