पुणे : पत्नीला नांदायला पाठवत नसल्याच्या रागातून जावयाने सासऱ्याची रिक्षा पेटवून दिल्याची घटना हडपसर परिसरात घडली आहे. दारूच्या व्यसनामुळे पत्नीला त्रास देत असल्याने सासरे तिला माहेरी घेऊन आले होते. याच रागातून जावयाने रिक्षा पेटवून मोठे नुकसान केले. या प्रकरणी हडपसर पोलिसांनी सराईत गुन्हेगाराला अटक केली आहे.
प्रशांत संजय शिवशरण (वय २५, रा. महात्मा फुले वसाहत, हडपसर) असे अटक करण्यात आलेल्या आरोपीचे नाव आहे. त्याच्याविरोधात यापूर्वी चोरी आणि शरीराविरुद्धचे गुन्हे दाखल आहेत. याप्रकरणी जितेंद्र रामचंद्र राऊत (वय ४६, रा. शांतीनगर वसाहत, हडपसर) यांनी हडपसर पोलीस ठाण्यात फिर्याद दिली आहे. ४ नोव्हेंबर रोजी पहाटे दोन वाजण्याच्या सुमारास कॅनॉल रोड, शांतीनगर वसाहत येथे ही घटना घडली.
पोलिसांनी दिलेल्या माहितीनुसार, जितेंद्र राऊत हे रिक्षाचालक आहेत. त्यांची मुलगी नंदिनी हिचा दोन वर्षांपूर्वी प्रशांत शिवशरण याच्याशी विवाह झाला होता. प्रशांतला दारूचे व्यसन असून, दारूच्या नशेत तो पत्नीला वारंवार मारहाण करून त्रास देत होता. त्यामुळे राऊत यांनी मुलगी नंदिनीला माहेरी आणले होते.
प्रशांतने पत्नीला पुन्हा नांदायला पाठवण्याची मागणी राऊत यांच्याकडे अनेकदा केली होती. मात्र, मुलीला होणारा त्रास लक्षात घेऊन त्यांनी तिला सासरी पाठवले नाही. याचाच राग मनात धरून प्रशांतने टोकाचे पाऊल उचलल्याचा आरोप आहे.
४ नोव्हेंबर रोजी पहाटे दोन वाजण्याच्या सुमारास प्रशांत शिवशरण याने कॅनॉल रोडच्या बाजूला पार्क केलेल्या जितेंद्र राऊत यांच्या रिक्षाला आग लावली. या आगीत रिक्षाचे मोठ्या प्रमाणावर नुकसान झाले.
या घटनेनंतर हडपसर पोलिसांनी गुन्हा दाखल करून प्रशांत शिवशरण याला अटक केली आहे. या प्रकरणाचा पुढील तपास पोलीस हवालदार रमेश गायकवाड करीत आहेत.
