पुणे : शहरातील कोरेगाव पार्क परिसरातील ‘प्लंज’ पबमध्ये नियमांचे उल्लंघन करून पहाटे ४ वाजेपर्यंत मद्यविक्री सुरू ठेवल्याचा आणि मोठ्या आवाजात लाऊड स्पीकर लावून नागरिकांना त्रास दिल्याचा प्रकार समोर आला आहे. याप्रकरणी पबच्या मालकासह सहा जणांविरोधात कोरेगाव पार्क पोलिसांनी गुन्हा दाखल केला आहे.
जितेश मेहता (पबचे मालक), सुनील पवार (व्यवस्थापक), विराज, शुभम आचारी, राहुलसिंग, तसेच डीजे ओंकार आणि डीजे श्रेयश यांच्यावर कारवाई करण्यात आली आहे. याप्रकरणी सहायक पोलीस निरीक्षक जितेंद्र खैरनार यांनी कोरेगाव पार्क पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, कोरेगाव पार्क येथील ज्वेलर टॉवरच्या तिसऱ्या मजल्यावर ‘प्लंज’ पब आणि बार आहे. नियमानुसार या ठिकाणी मध्यरात्री दीड वाजेपर्यंत मद्यविक्रीची परवानगी आहे. मात्र, नियमांचे उल्लंघन करून पबमध्ये पहाटे ४ वाजेपर्यंत मद्यविक्री सुरू होती. त्याचबरोबर मोठ्या आवाजात लाऊड स्पीकर लावून धिंगाणा सुरू होता.
१ नोव्हेंबर रोजी पहाटे ४ वाजेपर्यंत हा प्रकार सुरू असल्याने परिसरातील नागरिकांनी पोलीस नियंत्रण कक्षाला फोन करून तक्रार केली. त्यानंतर कोरेगाव पार्क पोलीस ठाण्याचे अधिकारी घटनास्थळी दाखल झाले. त्यावेळी पबमध्ये लाऊड स्पीकर सुरू असल्याचे आणि काही जण मद्यपान करत असल्याचे पोलिसांच्या निदर्शनास आले.
पोलिसांनी घटनास्थळावरून लाऊड स्पीकर तसेच काऊंटरवरील बिलिंग विभागातील साहित्य जप्त केले आहे. पबच्या मालकासह संबंधित सहा जणांविरोधात गुन्हा दाखल करण्यात आला असून, या प्रकरणाचा पुढील तपास पोलीस उपनिरीक्षक संतोष गायकवाड करीत आहेत.
