पुणे : महाराष्ट्र राज्य मार्ग परिवहन महामंडळाच्या कर्मचाऱ्यांसाठी यावर्षीची दिवाळी आनंददायी ठरणार आहे. एसटी महामंडळाचे अध्यक्ष आणि राज्याचे परिवहन मंत्री प्रताप सरनाईक यांनी सुमारे 83 हजार अधिकारी आणि कर्मचाऱ्यांसाठी विविध कल्याणकारी घोषणा केल्या आहेत. यामध्ये कर्मचाऱ्यांना प्रत्येकी 10 हजार रुपये सानुग्रह अनुदान (बोनस), पात्र कर्मचाऱ्यांना 12,500 रुपये सण उचल आणि महागाई भत्त्यात (DA) 58 टक्क्यांवरून 60 टक्के अशी वाढ समाविष्ट आहे.
दिवाळीच्या पार्श्वभूमीवर विविध कर्मचारी संघटनांच्या प्रतिनिधीं सोबत झालेल्या बैठकीत हे निर्णय घेण्यात आले. महामंडळ सध्या आर्थिक संकटातून जात असले, तरी कर्मचाऱ्यांचा सणाचा आनंद जपला पाहिजे या भूमिकेतून शासनाने हा मार्ग काढला आहे. या सर्व निर्णयांमुळे एसटी महामंडळावर सुमारे 160 कोटी रुपयांचा अतिरिक्त आर्थिक बोजा पडणार आहे.
प्रताप सरनाईक काय म्हणाले?
कर्मचाऱ्यांच्या कष्टाचा सन्मान: दिवस-रात्र मेहनत करून प्रवाशांना सुरक्षित सेवा देणाऱ्या कर्मचाऱ्यांना दिवाळीला अनुदान देणे हा त्यांचा हक्क आहे.
शासनाचे सहकार्य: मुख्यमंत्री देवेंद्र फडणवीस तसेच उपमुख्यमंत्री एकनाथ शिंदे आणि सुनेत्रा पवार यांच्या पाठबळामुळे एसटीचे भवितव्य अधिक उज्ज्वल होईल.
संपाचे हत्यार न वापरण्याचे आवाहन: एसटी ही सामान्य जनतेची जीवनवाहिनी असल्याने कर्मचाऱ्यांनी संप किंवा आंदोलनाचा मार्ग निवडू नये. प्रवाशांची गैरसोय टाळण्यासाठी सर्व समस्यांवर संवादाद्वारे तोडगा काढण्यास सरकार नेहमीच तयार आहे.
प्रवाशांना उत्तम दर्जाची सेवा देणे आणि महामंडळाला आर्थिकदृष्ट्या मजबूत करणे यासाठी सरकार प्रयत्नशील आहे. कर्मचाऱ्यांच्या इतर उर्वरित मागण्यांवर आता दिवाळीनंतर चर्चा करून निर्णय घेतला जाईल, असेही यावेळी स्पष्ट करण्यात आले
