पुणे: पुण्यातील वर्दळीच्या गणपती माथा परिसरात रविवारी सायंकाळी पीएमपीएमएल बसला अचानक आग लागल्याची घटना घडली. भररस्त्यात बसने पेट घेतल्याने परिसरात एकच खळबळ उडाली. काही क्षणांत आगीच्या ज्वाळा आणि धुराचे लोट पसरल्याने प्रवाशांसह नागरिकांमध्ये भीतीचे वातावरण निर्माण झाले.
मिळालेल्या माहितीनुसार, पीएमपीएमएल बस गणपती माथा परिसरातून जात असताना अचानक बसमधून धूर निघू लागला. काही वेळातच बसने पेट घेतला आणि आगीने रौद्र रूप धारण केले. आगीच्या ज्वाळा दूरवरूनही दिसत असल्याने घटनास्थळी नागरिकांची गर्दी झाली.
आग लागल्याचे लक्षात येताच चालक आणि वाहकाने प्रसंगावधान राखत तातडीने आवश्यक उपाययोजना केल्या. त्यामुळे मोठा अनर्थ टळला. बसमध्ये प्रवासी असल्याने या घटनेमुळे काही काळ घबराटीचे वातावरण निर्माण झाले होते.
View this post on Instagram
वर्दळीच्या मुख्य रस्त्यावरच बसला आग लागल्याने या मार्गावरील वाहतूक काही काळ ठप्प झाली. घटनेची माहिती मिळताच संबंधित यंत्रणांनी घटनास्थळी धाव घेतली आणि आगीवर नियंत्रण मिळवण्यात आले. त्यानंतर वाहतूक सुरळीत करण्याचे काम करण्यात आले.
दरम्यान, बसला आग नेमकी कशामुळे लागली, याचे कारण अद्याप स्पष्ट झालेले नाही. शॉर्टसर्किट किंवा अन्य तांत्रिक बिघाडामुळे आग लागली असण्याची शक्यता व्यक्त केली जात असून, नेमके कारण तपासानंतर स्पष्ट होणार आहे.
